དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོ་ཐེངས་དགུ་པ་སླེབ་ལ་ཉེ་བའི་སྐབས་སུ། རྒྱལ་ཁབ་བདེ་འཇགས་ལས་ཁུངས་ཀྱིས་ཚེས14ཉིན་དཔེ་མཚོན་གྱོད་གཞི5ཁྱབ་བསྒྲགས་བྱས་ཏེ། སྤྱི་ཚོགས་ཡོངས་ཀྱིས་རྒྱལ་ཁབ་བདེ་འཇགས་འདུ་ཤེས་མཐོར་འདེགས་སུ་གཏོང་བ་དང་། གསང་མྱུལ་ལ་ངོ་རྒོལ་བྱེད་པར་འབོད་སྐུལ་བཏང་།

གྱོད་དཔེ་གཉིས་པ།

ཉེ་བའི་ལོ་འགའི་རིང་། ཕྱི་རྒྱལ་གྱི་གསང་མྱུལ་ལས་ཁུངས་ཀྱིས་མུ་མཐུད་དུ་རང་རྒྱལ་གྱི་འབྲུ་རིགས་ཁྱབ་ཁོངས་ཀྱིས་སིམ་འཛུལ་བྱེད་ཤུགས་ཇེ་ཆེར་བཏང་ཞིང་། གང་འདོད་ཀྱིས་རང་རྒྱལ་གྱི་ལྟེ་བའི་ཚན་རྩལ་ཞིབ་འཇུག་གསང་འཕྲིན་རྐུ་འཁྱེར་བྱས། གནས་ཚུལ་འདི་ལ་དམིགས་ཏེ། རྒྱལ་ཁབ་བདེ་འཇགས་ལས་ཁུངས་ཀྱིས་ཁྲིམས་ལྟར་གྱོད་འབྲེལ་མི་སྣ100ལྷག་ལ་ཞིབ་བཤེར་བྱས་པ་དང་། གཙོ་གནད་གྱོད་འབྲེལ་ཁེ་ལས11ལ་རྩད་གཅོད་བྱས་ནས་ཁྲིམས་ལྟར་འབྲེལ་ཡོད་མི་སྣར་ཉེས་དོན་འགན་འཁྲི་བདའ་འདེད་བྱས།

རྒྱལ་ཁབ་བདེ་འཇགས་ལས་ཁུངས་ཀྱིས་རྩད་གཅོད་བྱས་པ་བརྒྱུད། རྒྱལ་ནང་གི་ཞིང་ལས་ཚན་རྩལ་ཀུང་སི་ག་གེ་མོའི་སྤྱི་གཉེར་པ་ཀྲུའུ་ཆེ་གེ་མོས་སོན་བཟོ་མཉམ་ལས་ཀྱི་མིང་ལ་ཁ་གཡར་ཏེ། སྔ་རྗེས་སུ་ཕྱི་རྒྱལ་གྱི་གསང་མྱུལ་ལས་ཁུངས་ལ་རྒྱལ་ནང་དུ་བཙུགས་པའི་ཀུང་སི་ཞིག་གི་འབྲས་སོན་རིགས5ཁྲིམས་འགལ་ངང་ཕྱིར་འཚོང་བྱས་ལ། རྒྱུན་ལྡན་ཕྱིར་འཚོང་གི་རིན་གོང་ལས་བརྒལ་བའི་གླ་རིན་བླངས། སྔར་ལས་ལྷག་པར་ལས་སྒོའི་ཁྱབ་རྒྱ་ཇེ་ཆེར་གཏོང་ཆེད། ཀྲུའུ་ཆེ་གེ་མོས་ད་རུང་ཞིང་ལས་ཚན་རྩལ་ཀུང་སི་གཞན་ཞིག་བཙུགས་ཏེ། ཕྱི་རྒྱལ་ལ་རང་རྒྱལ་གྱི་སྤུས་ལེགས་འབྲས་སོན་མང་པོ་ཕྱིར་འཚོང་བྱས།

2024ལོའི་ཟླ1པོར། ཨན་ཧུའེ་ཞིང་ཆེན་ཧི་ཧྥེ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་ཕྱི་རྒྱལ་ལ་ཁྲིམས་འགལ་ངང་གསང་འཕྲིན་མཁོ་སྤྲོད་བྱས་པའི་ཀྲུའུ་ཆེ་གེ་མོར་དུས་བཀག་བཙོན་འཇུག་ལོ1དང་ཟླ6ལྷག་གི་ཆད་པ་བཅད། གཞན་ཡང་། རྒྱལ་ཁབ་བདེ་འཇགས་ལས་ཁུངས་ཀྱིས་ཁྲིམས་ལྟར་གཞན་པའི་གྱོད་འབྲེལ་མི་སྣ17ལ་སྲིད་དོན་ཆད་པ་བཅད་པར་མ་ཟད། གྱོད་འབྲེལ་ཁེ་ལས་དག་ལ་རྩད་ཞིབ་ནན་མོ་བྱས་ཏེ། ཕན་ནུས་ལྡན་པའི་སྒོ་ནས་རང་རྒྱལ་འབྲུ་རིགས་ཁྱབ་ཁོངས་ཀྱི་བདེ་འཇགས་ཉེན་ཁ་སེལ།