(མགོ་ལོག) ནོར་བུ་རྡོ་རྗེ།
མ་ཡུམ་ལགས།
དྲན་གདུང་གི་མིག་ཟུང་ལས་ཁྱེད་ཉིད་ཤིན་ཏུ་གསལ་བའི་ཚུལ་དུ་མངོན་འོངས་ལ།
འཚོ་བའི་གྲུ་ཟུར་རེ་ནས་རླབས་ཆེན་གྱི་ཕྱག་ཟུང་ཡང་ཡང་བསྲིངས་པས།
ང་རང་སྤྲོ་དགའི་ངང་གཉིད་དུ་ཡུར་ཆོག་ལ།
སྐྲག་སྣང་དང་གནོད་འཚེ་གཏན་ནས་ཡོད་མ་མྱོང་།
མ་ཡུམ་ལགས།
ཆུང་དུས་སུ་ཁྱེད་ཉིད་ཅི་ཡང་ལྡན་ཞིང་ཅི་ཡང་ཤེས་པའི།
དགོས་པ་ཀུན་འབྱུང་གི་ནོར་བུ་ཞིག་ཏུ་བསམས་ཡོད་དེ།
མིན་ན་ཅིའི་ཕྱིར་མེད་པ་ཐམས་ཅད་ཁྱེད་ལ་རེ་ཞིང་།
མི་ཤེས་པ་ཐམས་ཅད་ཁྱེད་ལ་འདྲི།
ཀ་ངོ་ཡིག་ངོ་ཙམ་མ་ཤེས་པའི་གོང་ནས།
མ་ཎི་ཞེས་པའི་ཐ་སྙད་བྱིན་རླབས་ཅན་དེ་ཤེས་པ་ཡིན་ལ།
ལྷ་སྒྲུང་དང་གླིང་སྒྲུང་གི་བྱུང་བའང་ཁྱེད་ཀྱི་ངག་ལས་ཐོས་པ་ཡིན།
མ་ཡུམ་ལགས།
ཁྱེད་རང་སྔ་མོའི་དུས་སུ་ཡར་ལངས་ནས།
ཁྱིམ་གྱི་ལྟོ་རྒྱབ་ལ་འབད་དུས།
ཁྱེད་རང་གཉིད་དྭངས་ཡོད་དམ།
ཁྱེད་ཀྱིས་མཐོང་ལམ་རིག་གམ།
ཁ་ཆར་དང་བུ་ཡུག་མེད་དམ།
དེ་འདྲའི་འཚུབ་ཆ་ལངས་དོན་ཅི།
མ་ཡུམ་ལགས།
ཏག་ཏག་སྐབས་དེར།
ང་རང་ཧ་ཅང་སྐྱིད་པོར་གཉིད་ཡོད་ལ།
རྟ་བདུན་གྱི་འཛུམ་ཞལ་མངོན་པ་དང་མཉམ་དུ།
ཤིན་ཏུ་དཀའ་བའི་ཉམས་སྣང་དང་བཅས།
འདང་རྒྱག་ཅི་ཡང་མེད་པར།
སློབ་ཁང་གི་ཕྱོགས་སུ་འགྲོ་ཁུལ་བྱེད་པ་ནི།
ཅི་འདྲའི་ཁྲེལ་མེད་ཅིག་རེད་ཨང་།
མ་ཡུམ་ལགས།
ད་ལྟ་ཁ་ཡ་ན་ཟླའི་རྩེད་གྲོགས་མོད་པའི་སྤྱི་ཚོགས་ཀྱི་བར་གསེང་ནས།
ང་ཚོས་ཁྱེད་རང་བརྗེད་ཀྱིན་ཡོད་པ་འདྲ།
ལྭ་བ་སྲབ་སྲབ་གྱོན་ཏེ་དགུན་གྱི་ཙག་རླུང་ལ་རྒོལ་བའི་དཀའ་སྡུག་དང་།
ཆར་བས་ཁོག་ཆུ་འཕྲོད་པའི་འདར་སིག
ད་དུང་། སེམས་པ་བུ་ཕྲུག་ལ་འཁོར་ཞིང་།
རྐང་རྗེས་རྫ་རི་ལ་དཔར་བའི་ཁྱེད་ཀྱི་མཛད་རྗེས་སོགས།
ཡོད་ཚད་བརྗེད་ཀྱིན་པ་འདྲ།
མ་ཡུམ་ལགས།
ང་ཚོ་ནི་བསམ་མི་ཤེས་པའི་བྱིས་པ་སྟེ།
མགོ་བོ་ཁྱེད་ཀྱི་པང་ཁར་བཞག་ནས་རེ་བ་དག་སྣང་མེད་བྱས་སོང་།
སློབ་གྲྭ་ནི་སྡུག་གི་གནས་མལ་ཡིན་པར་སྙམ་ནས།
འཁྱག་ལྟོགས་དང་མེད་མུག་གི་འཁང་ར་མང་སོང་།
ཁྱེད་ཀྱི་དཀའ་སྡུག་མ་རྟོགས་པར་རང་ཉིད་ལ་རྩིས་ཆེན་བྱེད་པ་དེ་བས་མང་དྲགས་སོང་།
མ་ཡུམ་ལགས།
ཐ་ན། ང་རང་གློ་ལུ་ཙམ་བྱས་ཚེ།
ཨ་མའི་གཅེས་ཕྲུག་བླ་མས་སྐྱོབས་ཞེས་བསླུ་མེད་དཀོན་མཆོག་ལ་བཅོལ་ཏེ།
རང་ཉིད་ཀྱི་གློ་སྙིང་མཆིན་གསུམ་ལ་གས་ཁ་ཤོར་བ་ལྟ་བུའི་ན་ཟུག་ཅིག་ཡོད་ལ།
མ་ཎི་ཚར་གཅིག་བགྲངས་པའི་བར་གླགས་ནས་ཀྱང་སེམས་གཅོང་གིས་མནར་ཏེ་འདང་རྒྱག་དང་སེམས་ཁུར་གང་ཞིག་དགོས་མིན་ལ་ཞེ་ཁྲེལ་ཆེ་ཨང་།
མ་ཡུམ་ལགས།
ན་བའི་གཟེར་ཟུག་གིས་གདུང་ཞིང་གྲང་རེག་གི་ལོ་ཟླ་མང་ཡང་།
ཁྱེད་ཀྱིས་སྙིང་རུས་ཀྱི་དཔའ་རྟུལ་བསྐྱེད་དེ།
དཀའ་སྤྱད་ཀྱི་གདོང་ལེན་སྤོབས་པ་ནི་ཅི་འདྲའི་རླབས་ཆེ་ཨང་།
མ་ཡུམ་ལགས།
ད་ནས་བཟུང་ངས་ཚོར་ཡོད།
ཁྱེད་ཀྱི་རེ་ལྟོས་ཀྱི་མིག་ཟུང་མི་འདོར་བར།
སློབ་སྦྱོང་གི་མཛེས་པ་ལ་སེམས་པ་གླན་ནས།
རང་གཤིས་མི་འབོར་བ་དང་།
རང་མགོ་འཁྱོངས་པའི་མི་ཞིག་ཏུ་འགྱུར་བར་རྟག་ཏུ་བརྩོན་ངེས།
མ་ཡུམ་ལགས།
ཁྱེད་ནི་རྟ་བདུན་དབང་བོ་ཡིན།
ཁྱེད་ནི་མུན་སེལ་སྒྲོན་མེ་ཡིན།
ཁྱེད་ནི་ངའི་མ་རིག་པའི་རྨོངས་པ་ཐམས་ཅད།
དང་དུ་ལེན་པར་སྤོབས་པའི།
བྱང་ཆུབ་སེམས་དཔའ་ཡིན་ལ།
ང་ལ་རྟག་ཏུ་རེ་བ་དང་ཡིད་ཆེས་ཕངས་མེད་དུ་སྩོལ་བའི།
རྗེ་བཙུན་སྒྲོལ་མ་ཡིན།
མ་ཡུམ་ལགས།
ཁྱེད་མེད་ན་ངའི་དཔྱིད་དུས་ལ་ལྗང་མདོག་མེད་ཅིང་།
ཁྱེད་མེད་ན་ངའི་དབྱར་དུས་ལ་དྲོད་ཁོལ་མེད།
ཁྱེད་མེད་ན་ངའི་རྨི་ལམ་དང་རེ་ལྟོས་ཀྱིས་ཁེངས་པའི་ལོ་ཟླ་ག་ཚོད་ཅིག་མིག་ཆུས་སྦངས་སྲིད་ལ།
ཁྱེད་མེད་ན་ངའི་བློ་སྤོབས་ཀྱིས་ཁེངས་པའི་འདས་མ་ད་གསུམ་ལ་སྔ་མོ་ནས་རྫོགས་ཚིག་བཀོད་ཚར།
མ་ཡུམ། མ་ཡུམ། མ་ཡུམ་ལགས།
སྤྲོ་དགའི་གཏམ་བཟང་འཕྲོད་ས་ཁྱེད་ཡིན་ལ།
སྡུག་གི་གཡེར་བག་བྱེད་སའང་ཁྱེད་ཡིན།
རྟག་ཏུ་དྲན་སླ་བ་ནི་ཁྱེད་ཡིན་ལ།
གཏན་དུ་བརྗེད་དཀའ་བའང་ཁྱེད་ཡིན།
ཁྱེད་ཁོ་ནས་ངའི་ཉིན་མཚན་དུས་དྲུག་བཟུང་ཡོད།
ཁྱེད་ཁོ་ནས་ངའི་ལུས་ངག་ཡིད་གསུམ་བཟུང་ཡོད།
དེར་བརྟེན། ང་ཚོས་ནམ་ཡང་ངག་འཇམ་པོས།
བྱ་སྤྱོད་ལེགས་པོས།
མ་ཡུམ་ལགས་དྲན་པར་བྱ། མ་ཡུམ་ལགས་ཀྱི་རེ་བ་དྲན་པར་བྱ།