སྤྲིན་དཀར་པོ་ཡོད་ས་དེ།(ཞར་བཀོད་གཉིས)
____ Wལ་ཕུལ་བ།
ཞྭ་ནག་པ། (གསེར་རྟ)
རྒྱང་རིང་དུ་ལག་པ་བསྲིང་དོན
ངས་དོན་དམ་གྱི་དངོས་པོ་ཞིག་བཙལ་འདོད་པས་ཡིན
མིག་གིས་མཐོང་མི་ཐུབ་ཅིང
ལག་པས་རེག་པར་དཀའ་བ་དེ
བརྩེ་དུང དགའ་སྐྱོ
ཆགས་སྡང འཁྲེང་སེམས
གཟུགས་མེད་ཅིང་གཟུགས་སུ་སྣང་བ་དེ་དག
ཡང་ན རི་མོ་ཞིག་ཏུ
མིག་ཤེལ་དཀར་པོ་གྱོན་པའི་བུ་མོ་དེ
སྤྲིན་དཀར་པོ་རྒྱུ་བའི་ནམ་མཁའ་དེའི་འོག་ཏུ
དལ་བ་དལ་བར་སྐྱོད་ཀྱིན་པ་དེའོ
༢༠༢༣-༩-༧ཉིན།
སྙིང་ཉེ། ཕྱི་རོལ་གྱི་ཆར་སྒྲ་ཐོས་སམ།
Wལ་ཕུལ་བའི་སྙན་ངག
སྙིང་ཉེ ཕྱི་རོལ་གྱི་ཆར་སྒྲ་ཐོས་སམ
ངས་ས་ཁུ་སཱའི་རོལ་དབྱངས་ལ་མཉན་རྗེས་ཆར་སྒྲ་ཐོས་བྱུང
དེའང་རོལ་དབྱངས་ཤིག་རེད ཚིག་གི་མཚོན་ཐབས་བྲལ་བའི་བརྩེ་དུང་བཞིན
སོ་སོར་གྱེས་མ་འདོད་པའི་གཞོན་ནུ་ཕོ་མོ་ཞིག་གི་ངོ་གདོང་བཞིན་རླན་པའི་ས་གཞི་འདི
ཡང་ན བརྩམས་སྒྲུང་ནང་གི་བུ་མོ་དེའི་གཏམ་རྒྱུད་བཞིན་སྙིང་ཉེ་བའི་ནམ་མཁའ་འདི
ཡུལ་གྱི་བར་ཐག་གིས་ཆོད་པའི་འུ་གཉིས་བཞིན་ཧ་ཅང་མཛེས
སྙིང་ཉེ ཕྱི་རོལ་གྱི་ཆར་སྒྲ་ཐོས་སམ
༢༠༢༣-༩-༡༠མཚན་མོར།
མིག་ཤེལ་གྱོན་པའི་བུ་མོ།
Wལ་ཕུལ་བའི་སྙན་ངག
སྐྲ་ཚོགས་དཀར་ཕྱེད་དུ་མ་སོང་སྔོན་ནས
རྒྱང་རིང་གི་གཟུགས་རྣམས་རབ་རིབ་མག་མོག་ཏུ་གྱུར
___ ཚོད་དཔག
ངས་ཚོད་ཚོད་ལ
ཁྱོད་ཀྱིས་བསྐུར་པའི་ཕ་ཡུལ་དེ
འུ་གཉིས་ཁོ་ནར་དབང་བའི་ས་ཁྲ་ཞིག་ཏུ་ཡོད་ན་སྙམ
བུ་མོ དགོངས་པ་མ་ཚོམས
ཁྱོད་ཀྱིས་ཆོག་མཆན་མེད་པར
ངས་ཁྱོད་ལ་སྙན་ངག་བྲི་འདོད
ང་རང་དབྱངས་གསལ་ལ་དགའ་བས
ང་རང་ཁྱོད་ལ་དགའ
དེ་ནི ཁྱོད་རང་དབྱངས་དང་གསལ་བྱེད་ལ་དགའ་བས་ཡིན་ངེས
ནམ་ཞིག་ན ནམ་ཞིག་ན
ང་ཡི་སྙན་ངག་འདི་དག འུ་གཉིས་ཀྱི་གཏམ་རྒྱུད་དུ་གྱུར་ཡང་སྲིད
ནམ་ཞིག་ན ནམ་ཞིག་ན
ང་ཡི་སྙན་ངག་འདི་དག
ཁྱོད་རང་བཟི་སྲིད་པའི་ཆང་དཀར་པི་ཙེ་གང་ཡིན་ཡང་ཆོག་གོ
༢༠༢༣-༩-༨
ཞྭ་ནག་པ། ༡༩༩༩ལོར་ཕ་ཡུལ་གསེར་རྟ་རགས་བཀྲམ་གྱི་ཁྱིམ་ཚང་ཕལ་བ་ཞིག་ཏུ་སྐྱེས། དངོས་མིང་ལ་གཞན་ཕན་ཉི་མ་ཟེར། ༢༠༡༠ལོར་རགས་བཀྲམ་ཨ་མའི་གཅེས་སྐྱོང་སློབ་གྲྭར་ཞུགས།༢༠༡༧ལོའི་ཡས་མས་ནས་བོད་ཀྱི་རྩོམ་རིག་ལ་སྦྱང་བ་ཅུང་ཙམ་བྱས་ཤིང་བརྩམས་ཆོས་རེ་འགའ་མཆོད་མེ་བོད་ཀྱི་དྲ་བ་དང་དེབ་རེ་འགའ་རུ་བཀོད་མྱོང་། ད་ལྟ་སྐད་ཡིག་རང་འདུན་པའི་ལས་ཀ་གཉེར་བཞིན་ཡོད།
རྩོམ་སྒྲིགཔ། དོན་འགྲུབ་རྡོ་རྗེ།