མི་དམངས་དྲ་བ།

༄༅།།གོང་དཀར་གནམ་ཐང་བབས་ཚུགས་T1དང་T2ཀྱི་སྒྱུར་བཀོད་ལས་གྲྭ་འགོ་ཚུགས་པ།

གསར་འགྱུར་སྤེལ་དུས། 　【2023ལོའི་ཟླ་ 06ཚེས་13ཉིན། 09:51】（རྩོམ་སྒྲིག་འགན་འཁུར་པ། མཁའ་འགྲོ།）

    འདི་ག་ཚགས་པར་ཁང་དུ་ལྷ་ས་ནས་ཟླ་6ཚེས་10ཉིན་གནས་ཚུལ་འབྱོར་གསལ། ལྷ་ས་གོང་དཀར་གནམ་ཐང་གི་གལ་ཆེའི་མཁའ་འགྲུལ་སྐྱེལ་འདྲེན་འགན་ལེན་ནུས་པ་སྔར་བས་ཆེ་རུ་གཏོང་བ་དང་ལྷ་ས་གོང་དཀར་གནམ་ཐང་གི་རྒྱལ་སྤྱིའི་འགག་སྒོའི་ནུས་པ་ཆེ་རུ་གཏོང་ཆེད། ཉིན་ཤས་གོང་། དམངས་སྤྱོད་མཁའ་འགྲུལ་བོད་ལྗོངས་དམངས་སྤྱོད་མཁའ་འགྲུལ་ཅུས་ཀྱིས་ལྷ་ས་གོང་དཀར་གནམ་ཐང་བབས་ཚུགས་T1དང་T2ཀྱི་སྤྱི་ཡོངས་སྒྱུར་བཀོད་ལས་གྲྭ་ལས་འགོ་ཚུགས་པའི་མཛད་སྒོ་འཚོགས་པ་རེད།
    ཤེས་རྟོགས་བྱུང་བར་གཞིགས་ན། དེ་སྔའིT1གནམ་ཐང་བབས་ཚུགས་སྒྱུར་བཀོད་བྱས་རྗེས་རྒྱལ་ནང་གི་སྐྱེལ་འདྲེན་དང་འགན་ལེན་གལ་ཆེན་གྱི་སྐྱེལ་འདྲེན་ནུས་པ་དང་ལེན་བྱེད་རྒྱུ་དང་T2གནམ་ཐང་བབས་ཚུགས་ཧྲིལ་པོ་རྒྱལ་སྤྱིའི་བྱེད་ནུས་ཁུལ་དུ་སྒྱུར་བཀོད་བྱེད་རྒྱུ་རེད།
    ཨར་སྐྲུན་གྱི་འཆར་གཞི་ལྟར་ན། སྔོན་དཔག་བྱས་ན་ཟླ་11པའི་ཟླ་དཀྱིལ་དུ་གནམ་ཐང་བབས་ཚུགས་T1གི་སྒྱུར་བཀོད་ལས་གྲྭའི་གྲུབ་ཆའི་ཨར་སྐྲུན་ལེགས་སྒྲུབ་བྱེད་རྒྱུ་དང་། འདི་ལོའི་ལོ་མཇུག་ཏུ་T2ས་ཁོངས་ཀྱི་ཨར་སྐྲུན་ལེགས་གྲུབ་ཟིན་ནས་ཞིབ་བཤེར་རྩིས་ལེན་བྱེད་རྒྱུ། 2024ལོའི་ཟླ་6པའི་ཟླ་མཇུག་ཏུ་རྣམ་གྲངས་ཆ་ཚང་ལས་མཇུག་འགྲིལ་ནས་ཞིབ་བཤེར་རྩིས་ལེན་བྱེད་རྒྱུ་བཅས་རེད།