(ཞར་བཀོད་ཚན་པ་གཉིས།)
གཡུ་རྔོག་ལུང་རྟོགས།
བྲག་དཀར་རྟ་སོའི་གླུ་བ་དྲན།།
ཡར་ཀླུང་ཁོག་གི་གཞས་དག་དྲན།།
ཁོ་བོ་བཞུད་ཚེ་སྙན་ངག་ཀྱང་།།
ནུབ་པར་སྨྲ་བའི་རིགས་སྨྲའི་གཙོ།།
ཀློང་ཆེན་པ་ཡི་སྙན་ངག་དྲན།།
ཤེས་རབ་བྱམས་བརྩེ་རས་གཟན་གྱིས།།
རྡོག་པར་དཀྲིས་པའི་རྒྱལ་ཁམས་པ།།
བདག་ཅག་སྙིང་གི་མེས་པོ་སྟེ།།
ཞབས་དཀར་པ་ཡི་གླུ་ཡང་དྲན།།
ཚིག་ལ་སྙན་ཆའི་རོལ་དབྱངས་འཕྱུར།།
དོན་ལ་ཟབ་རྒྱས་སྙིང་གིས་ཕྱུག
།
འཆར་སྒོ་འབྱེད་པའི་ལྡེ་མིག་སྟེ།།
དཔལ་སྤྲུལ་དགེ་ཆོས་གླུ་ཡང་དྲན།།
ཐོས་བརྩོན་སྡུག་བཙུར་མ་ཡིན་པར།།
མགྲིན་པའི་རྩ་མདུད་གྲོལ་བ་ལས།།
སྙན་འགྱུར་གླུ་དབྱངས་གྱེར་པ་ལ།།
རང་དབང་འབྱོར་བ་དག་ཀྱང་དྲན།།
ཡིད་ལ་སྐད་ཅིག་གིས་འཁྲུངས་ཀྱང་།།
ཡི་གེ་ལ་ནི་མ་འཁོད་པའི།།
སྙན་ངག་དག་ཀྱང་དྲན་འོངས་ཏེ།།
བདག་གི་ལུས་ནི་ཞིག་ལ་རྩོམ།།
སྙན་ངག་ཅེས་པ་ཚོར་བ་ཡི།།
ཁ་དོག་ཅིག་གི་འོད་ཟེར་རེད།།
སྙན་ངག་ཅེས་པ་དྲང་བདེན་གྱི།།
སྨྲ་ལྕེ་ཞིག་གི་འཐུབ་ཚབ་རེད།།
སྙན་ངག་ཅེས་པ་སྒྱུ་འཕྲུལ་གྱི།།
ཕལ་ལས་འདས་པའི་ཆོ་འཕྲུལ་རེད།།
སྙན་ངག་ཅེས་པ་ཐར་བ་ཡི།།
ལམ་སྟེགས་འཆའ་བའི་ཐེམ་སྐས་རེད།།
"སྙན་ངག་ཅེས་པ་འཆིང་བའི་སེམས།།
རང་དབང་བདེ་བ་སྦྱིན་པ་ཡིན།།"
སྙན་ངག་ཅེས་པ་གུ་ཡངས་ཀྱི།།
བློ་རྒྱ་སྤྲོས་པའི་རྩྭ་ཐང་རེད།།
སྙན་ངག་ཅེས་པ་མི་གཞི་ཡི།།
སྒལ་ཚུགས་སྲ་བའི་རྒྱུ་རྐྱེན་རེད།།
སྙན་ངག་ཅེས་པ་སྐར་མདའ་ཡི།།
གློག་ཞགས་འཁྱུགས་པའི་མཚར་སྡུག་རེད།།
སྙན་ངག་ཅེས་པ་ཐལ་གོར་གྱི།།
དཀྱིལ་དུ་འཁྲུངས་པའི་མར་ལོ་རེད།།
སྙན་ངག་ཅེས་པ་སྐྱེས་པ་ཕོའི།།
བློ་གཤོག་དང་ནི་རྔམ་བརྗིད་རེད།།
སྙན་ངག་ཅེས་པ་ཟ་མ་མོའི།།
བརྩེ་བ་དང་ནི་མིག་ཆུ་རེད།།
སྙན་ངག་ཅེས་པ་སྟོན་པ་ཡིས།།
ཆོས་ཕུང་བརྒྱད་ཁྲི་བཞི་སྟོང་དག།།
རྗེས་རབས་པ་ཡི་བགོ་སྐལ་དུ།།
བསྩལ་བའི་ལྷ་ཡི་ཕོ་ཉ་རེད།།
སྙན་ངག་ཅེས་པ་སྲོང་བཙན་གྱིས།།
མགུར་ནས་ང་ཚོ་ཕྱི་རབས་པར།།
'སྲོང'དང'སྒམ'གྱི་ཐ་སྙད་དག།།
རུས་པར་བསྟིམས་པའི་གདམས་པ་རེད།།
སྙན་ངག་ཅེས་པ་རི་ཁྲོད་ཀྱི།།
ན་བུན་གྱོན་པའི་བརྟུལ་ཞུགས་པར།།
དབྱངས་ཅན་མ་ཡིས་གནང་བ་ཡི།།
ལྟོ་གོས་གཏམ་གྱི་འཚོ་རྟེན་རེད།།
སྙན་ངག་ཅེས་པ་དགེ་ཆོས་ཀྱིས།།
དྲན་བདེན་དོན་དུ་རང་སྲོག་ཀྱང་།།
འདོར་བར་ཕོད་པའི་སྙིང་སྟོབས་ལ།།
སྐུལ་འདེད་གཏོང་བའི་ནས་ཆང་རེད།།
སྙན་ངག་ཅེས་པ་གྲྭ་རྐྱང་ཚོའི།།
ཆུ་ཁོལ་གོར་རྒྱོང་ལ་བརྟེན་པའི།།
འཚོ་བའི་ཀློང་གི་བདེ་སྐྱིད་དེ།།
ཚེ་གྲོགས་སྙིང་གི་དྭངས་མ་རེད།།
སྙན་ངག་ཅེས་པ་ཐེ་གོར( Tagore)གྱི།།
སྨྲ་རའི་ནགས་ཚལ་ལས་སྐྱེས་པའི།།
འོད་ཟེར་འཕྲོ་བའི་ཡིག་འབྲུ་སྟེ།།
གླིང་འདིའི་ངོ་སོ་བསྟོད་སྤྱད་རེད།།
སྙན་ངག་ཅེས་པ་ཕོལ་སམ (Paul Simon)གྱིས།།
སོལ་རླངས་སྒོ་ལྕགས་འབྱེད་པ་ལས།།
རང་སྲོག་འཕྲོག་པའི་གཤེད་མ་སྟེ།།
བསླུ་བྲིད་འདྲེ་ལག་རྐྱོང་སྟངས་རེད།།
སྙན་ངག་ཅེས་པ་མའེ་ཁོལ(Michael Jackson)གྱི།།
གར་སྟེགས་སྟེང་གི་འཕྱོ་སྟངས་ཏེ།།
མོ་བརྒྱའི་གཅིན་པ་འཆོར་འཇོག་ཅིང་།།
ཕོ་བརྒྱའི་ཕྲག་དོག་མཆེད་སྤྱད་རེད།།
སྙན་ངག་ཅེས་པ་ཧི་ཙི(海子)ཡིས།།
མེ་འཁོར་བཞུད་ལམ་སྟེགས་བུ་རུ།།
མགོ་བོ་བཅད་དུས་འོ་མ་ཡི།།
ངོ་བོར་འཕོས་པའི་ཟུངས་ཁྲག་རེད།།
སྙན་ངག་ཅེས་པ་དྲུང་པ་ཡིས།།
ནུབ་ཏུ་ནང་བསྟན་སྤེལ་བ་ལ།།
རྟེན་འབྲེལ་སྒོ་འཕར་འབྱེད་པ་ཡི།།
སྒྲའེ་ཡན་ནཱ(Diana J mukpo)ཡི་ཟུར་མིག་རེད།།
སྙན་ངག་ཅེས་པ་རང་གྲོལ་གྱི།།
ཆང་དང་དུ་བ་ལས་འོངས་ཤིང་།།
རྡོ་དུག་ཕོག་པའི་ཚེ་སྲོག་ལ།།
རོ་ལངས་རྒྱབ་པའི་གདོན་གཟུགས་རེད།།
སྙན་ངག་ཅེས་པ་མཛེས་མ་ཡི།།
ཟུར་མིག་དག་ཀྱང་བསྐྱུར་བྱས་ཏེ།།
ཤོག་སྨྱུག་རུམ་པའི་སྨྱུག་ཐོགས་པའི།།
སེམས་འཕྲོག་མཛེས་མ་གཞན་ཞིག་རེད།།
སྙན་ངག་ཅེས་པ་མི་བུ་ཡི།།
སྒལ་ཚུགས་རྣོ་རུ་བསྐྲུན་སྤྱད་རེད།།
རང་ངོ་ལེགས་པར་འཕྲོད་སྤྱད་རེད།།
ཚུགས་ཐུབ་ལྟ་བ་སྐྱེ་སྤྱད་རེད།།
ཉི་ཟླའི་གཟི་བྱིན་འོད་པོ་ཆེ།།
ས་གཞི་ལ་ནི་བརྩེ་བས་འཁྱུད།།
བསིལ་འཇམ་རླུང་དང་ཆར་བ་དག།
།
གདུང་བས་མ་བཟོད་སྐྱོ་གླུ་འབྱིན།།
སྣང་བའི་ཁམས་ཀྱི་ཚོར་བ་དག།།
རབ་མེད་ཆུ་བོ་བྲུག་པ་བཞིན།།
དབྱངས་དང་རམ་འདེགས་སྐྱ་བོ་ཡིས།།
འཇིག་རྟེན་ཀྱང་ནི་སྐྱ་བོར་བསྒྱུར།།
སྙན་ངག་ཡིན་མདོག་ཁ་བོ་ཡི།།
ཚིག་གི་ཚོགས་པ་མང་པོ་ཞིག།།
དུས་ཀྱི་རླབས་ལ་བསྐྱོན་པ་ཡིས།།
སེམས་ཀྱི་ཁོངས་སུ་ན་བུན་བསྐྱིལ།།
ཡིད་གཉིས་དོགས་པའི་རླུང་བུ་ལྡང་།
གློག་དང་འབྲུག་སྒྲ་དྲག་ཏུ་མཆེད།།
ཚོར་བ་ཆུ་ཡི་གཟུགས་སུ་བརྡོལ།།
ཡ་ཆུང་གངས་ཀྱི་རི་བོ་ནི།།
ན་ཟུག་དྲོད་ཀྱིས་རླངས་པར་བཞུས།།
12/09/2014