དེབ་གསར《འཇམ།---Mགྲོང་ཚོའི་རྣམ་བཤད།》ཅེས་པའི་གླེང་སློང་བའི་གཏམ།

ལུག་དེ་ནི་ཅི་འདྲའི་གཡང་ལུག་ཅིག་རེད་ཨང་། ལུག་དེའི་སྟེང་དུ་འཇམ་གྱི་འཚོ་གནས་ཀྱི་ནང་དོན་ཡོད་ཚད་འདུས་ཤིང་། འཚོ་གནས་ལས་བྱུང་བའི་ཤེས་རབ་སྟེ།  རྟེན་ཅིང་འབྲེལ་འབྱུང་གི་འཚོ་བའི་ངོས་ཟིན་དང་ངོས་ཟིན་དེ་སྦྱོར་བར་བསྟར་བའི་ངལ་རྩོལ་གྱི་སྣང་ཚུལ་ཡོད་དོ་ཅོག་འདུས་ཡོད།  ང་ཚོས་སྔར་བཞིན་ལུག་འདི་དཔེ་མཚོན་དུ་བཀོད་ནས་འཇམ་གྱི་རིག་གནས་ཀྱི་ནང་སྙིང་ལ་ལག་སྙོབ་བྱེད་དགོས་ཤིང་།  དེ་ལྟར་ལག་སྙོབ་བྱེད་དུས་Mགྲོང་གི་ཕ་མེས་ཡང་མེས་ནས་བསགས་ཏེ་བརྒྱུད་ཡོང་བའི་འཚོ་གནས་ཀྱི་ཤེས་རབ་རྡོག་རྡོག་དེ་ཡང་ལག་མཐིལ་ཏུ་ལེན་ཐུབ།

ལུག་དེ་ལུ་གུ་ཆུང་ཆུང་ཞིག་ནས་ཤ་བཟན་ཞིག་ཏུ་འགྱུར་པའི་བར་དུ། ཉིན་ལ་རིའི་སྒང་ནས་རྩྭ་ཡི་རྩི་བཅུད་ལ་རོལ་བ་དང་། སྲོད་ལ་གྲོང་ཚོའི་ནང་གི་ལུག་ཁང་དུ་ལོག་ཡོང་རྗེས་ཉིན་ལ་ཟས་པའི་རྩྭ་དེ་དག་ཁོག་པའི་ནང་ནས་རིལ་མར་གྱུར་ཏེ་ལུག་ཁང་དུ་བཏང་། རིལ་མ་སྐམ་པོར་གྱུར་རྗེས་ཁྱིམ་བདག་གི་ཐབ་ཚང་ནང་གི་མེ་ཐབ་གྱི་འབུད་ཆས་སུ་གྱུར། མེ་ལ་འབར་བའི་ཐལ་བ་དེ་ཡང་རྟ་དང་བ་ཕྱུགས་སོགས་ཀྱི་ཟོག་ཁང་དང་གསང་སྤྱོད་སོགས་སུ་བྱོ་སྟེ་དེའི་སྒང་དུ་ལུག་གི་གཅིན་པ་སོགས་བཏང་རྗེས་ཡུན་གྱིས་ལུད་དུ་གྱུར་པ་དང་།  དགུན་དང་དཔྱིད་ཀྱི་དུས་སུ་ལུད་དེ་དག་ཞིང་ནང་དུ་དབོར་འདྲེན་བྱས་ནས་སྟོར་པ་ན་ལོ་ཏོག་གི་ལུད་རྫས་སུ་གྱུར། ཡང་ལུག་དེས་ལོ་རེ་རེར་བལ་དཀར་འཇོ་ལོ་ལོ་ཁྱིམ་བདག་ལ་སྐྱེས་སུ་འབུལ་ཅིང་།  ཁྱིམ་བདག་གིས་ལོ་རེར་བྲེགས་པའི་བལ་ནི་འཕང་ལ་བརྟེན་ནས་སྐུད་པར་འཁེལ་ཅིང་། སྐུད་པས་ཐགས་བཏགས་ནས་སྒྱེ་མོ་དང་ཐག་པ་སོགས་བཟོ།  སྒྱེ་མོའི་ནང་དུ་སྟོན་གྱི་ལོ་ལེགས་ཀྱི་འབྲུ་རིགས་བླུགས་ནས་ཐག་པས་རྒྱབ་ཏུ་འཁུར་ཏེ་འགྲོ་དུས།  འཇམ་པའི་མི་དེའི་གདོང་དུ་རྔུལ་ནག་ཁྲོམ་ཁྲོམ་བྱེད་ཀྱང་འཛུམ་པའི་མེ་ཏོག་གདོང་གི་མདངས་སུ་བཞད་ཡོད། ལུག་དེ་གསོན་དུས་ཀྱང་དེ་ལྟར་ཁོ་ཚང་གི་འཚོ་བའི་ག་ས་གར་དུ་མངོན་ཡོང་སྟེ། ལོ་དེ་དག་གི་རིང་ལ་ཁོ་ཚང་གི་འཚོ་གནས་ཀྱི་ཐད་དུ་བྱས་རྗེས་རླབས་ཆེན་བཞག་ཡོད། དེར་བརྟེན།  ལུག་དེ་ནི་གཡང་ལུག་ཡིན་ཞིང་ཁྱིམ་འདི་ལ་གཡང་ཡང་དང་ཡང་དུ་སྤྲད་ཡོང་ཞིང་།  ཆེས་མཐར་མཇུག་ད་དུང་རང་གི་ཤ་ཁྲག་གདོས་བཅས་ཀྱི་ལུས་ཕུང་གིས་ཁྱིམ་འདི་ལ་འཚོ་བའི་ཉེར་མཁོ་སྤྲད་ཡོང་།

Mགྲོང་གི་འཚོ་གནས་ཀྱི་ཤེས་རབ་ནི་བོད་ཀྱི་འབྲོག་གི་རིག་གནས་དང་ཞིང་བའི་རིག་གནས་གཉིས་ལྷན་གཅིག་ཏུ་བསྡུས་བའི་ཉིང་བཅུད་ལྟ་བུར་ཆགས་ཡོད། གོང་དུ་བཤད་ཟིན་པ་ལྟར་ང་ཚོས་འདི་ལྟ་བུའི་རིག་གནས་ལ་འཇམ་གྱི་རིག་གནས་ཟེར།  འཇམ་གྱི་རིག་གནས་ནི་འཚོ་གནས་ཀྱི་ཤེས་རབ་ཅིག་ཡིན་ཞིང་། ཤེས་རབ་འདི་ནི་ང་ཚོས་ད་ལྟའི་བར་དུ་བོད་ཀྱི་ཆོས་ལུགས་ཀྱི་ཤེས་རབ་དེ་དག་ནང་བཞིན་མི་ཚོགས་ནང་གི་བློ་རིག་ཅན་དེ་དག་གིས་ཆེད་མངགས་ཀྱིས་ཡིག་ངོར་བཀོད་ཅིང་། སློབ་སྦྱོང་བྱས། རྒྱུད་འཛིན་བྱས། ཉར་འཇོག་བྱས་མེད་ཀྱང་།   དམངས་ཁྲོད་ཀྱི་མི་ཕལ་བ་དག་གིས་མ་ཉམས་པར་མི་རབས་ནས་མི་རབས་བར་རྒྱུད་འཛིན་བྱས་ཡོང་ཡོད།   དམངས་ཕལ་བ་དེ་དག་གི་འཚོ་གནས་ཀྱི་ཉམས་མྱོང་དང་བློ་རིག་དེ་དག་ལ་ང་ཚོས་ད་ལྟའི་བར་དུ་སྣང་མེད་བྱས་ནས་ཡོང་བའམ་མ་མཐའ་ཡང་དེ་ལ་མཐོང་ཆེན་ཅི་ཡང་བྱས་མེད་པ་འདྲ། ཡིན་ན་ཡང་། ཏག་ཏག་དེ་ལྟ་བུའི་འཚོ་གནས་ཀྱི་ཤེས་རབ་ནི་བོད་ཅེས་པའི་མཐོ་སྒང་གི་མི་རིགས་འདི་རང་བྱུང་གི་ཁོར་ཡུག་གང་གིས་ཀྱང་འཚོ་གནས་ལ་དཀའ་ཁག་ཡང་ཡང་བཟོས་ཡོང་བའི་ཡུལ་གྲུ་ཞིག་ནས་འཚོ་ཞིང་གནས་ཐུབ་པའི་ནང་རྐྱེན་གལ་ཆེན་དེ་ཡིན་པ་རེད། ད་ལྟའི་བར་དུ།  ང་ཚོ་སེན་མགོ་རྣག་དང་སེན་རྟིང་ཁྲག་བྱས་ནས་ཡོང་པའི་ཡུལ་མི་དེ་དག་གིས་གསོས་ནས་ཡོང་པ་ཡིན་སྲིད་ཅིང་།  དེ་དག་གི་ངལ་རྩོལ་གྱི་དཀའ་སྡུག་དང་དེ་དག་གི་ངལ་རྩོལ་གྱི་བློ་གྲོས་ཀྱིས་ང་ཚོ་རྒྱབ་མ་གྲང་ཕོ་བ་མ་ལྟོགས་པར་ཡོང་བ་ཡིན། འདི་ནི་མི་ཡུལ་འདིའི་ཆེས་བབ་ཆགས་པའི་གནས་ལུགས་ཤིག་སྟེ།  རིག་གནས་ཀྱི་མེ་ཏོག་ཡོད་ཚད་ཀྱང་ཆེས་ཕལ་བའི་འཚོ་གནས་ཀྱི་ཞིང་ས་འདི་འདྲ་ཞིག་ནས་སྐྱེས་ཏེ་བཞད་པ་ཡིན། ལོ་ངོ་སྟོང་ཕྲག་གི་ལོ་རྒྱུས་ཀྱི་ཆུ་རྒྱུན་རིང་མོས་ད་ནི་མང་པོ་མང་པོ་ཞིག་ཁུར་ཏེ་ཕྱིར་མི་ལྡོག་པའི་ཐག་རིང་དུ་ཁུར་ཚར་མོད། འཚོ་གནས་ཀྱི་ཤེས་རབ་དེ་ནི་ད་དུང་ཡང་མཚམས་མ་ཆད་པར་ང་ཚོའི་ཡུལ་མི་རྣམས་ཀྱི་རྩ་ལམ་དུ་ལྷུང་ལྷུང་འབབ་བཞིན་ཡོད་ཅིང་། ལྷུང་ལྷུང་འབབ་པའི་སྒྲ་དེ་ནི་ང་ཚོའི་ཚེ་སྲོག་གི་བཞུར་སྒྲ་རེད།