ཁྱེད་ནི་ཅི་འདྲའི་དྲན་སླ་ཨང་།
རྨི་ལམ་གང་མང་རྨིས་ཏེ་ཚོར་འདུ་རྒྱས།།
མཚན་མོ་རེ་རེ་བརྒལ་ནས་རྨིས་མྱོང་ལ།།
སྨིན་དྲུག་སྐར་མ་མཐོང་དུས་ལྷག་པ་རུ།།
དྲན་པའི་གཏིང་དུ་ཟུག་པ་ཅི་འདྲ་ཡང་།།
དེ་བས་མཐའ་མེད་སྲིད་པའི་གོམ་རིམ་ལ།།
ཉིན་དང་མཚན་མོ་དབྱེ་བ་མེད་པ་དྲན།།
དྲན་པའི་ལྷན་དུ་གདུང་བ་མཐའ་མེད་པ།།
ཡང་ཡང་དྲན་ན་ཡང་ཡང་སྐྱོ་དོན་ཞིག།
ངག་གི་ལྷན་ཐབས་ནང་དུ་སྙིང་པོ་ཚོགས།།
བཏང་སྙོམས་ཚིག་ལ་མ་འབྲེལ་ང་ལ་ཞེན།།
ང་ཡི་གློ་སྙིང་གསེང་དུ་ཡུན་རིང་ཆགས།།
སྣང་བརྙན་རིང་མོ་ཞིག་དང་འདྲ་བ་ཨང་།།
བསླུ་བྲིད་སྒྱུ་མའི་གྲོང་དུ་མཐའ་ཡས་པའི།།
ཡིད་ལ་མངོན་དུ་དགའ་བ་ཆོ་འཕྲུལ་རེ།།
འགྱུར་ལྡོག་བན་བུན་ནང་གི་དཀར་ནག་ལས།།
འདྲིས་ཤིང་ཡུན་དུ་ཆགས་པ་སླར་ཡང་དུ།།
ང་ལ་དབང་བ་མ་བྱུང་ཉམས་ཀྱི་མགུར།།
ནར་སོན་རྒྱུན་རིམ་དེ་ལས་ཚོར་རྟོག་ནི།།
དྲན་ཤིང་ཡངས་མོ་ཞིག་གི་དབུ་བཟུང་དོན།།
སྐྱོ་ལ་གདུང་བ་འདྲེས་པའི་ངག་སྨྲ་དེས།།
སེམས་པ་སེམས་ལ་མ་ཤོང་དལ་བུ་རུ།།
འཕྲུལ་གྱི་ཟླ་བའི་འོག་ནས་གློ་བུར་ངང་།།
དྲན་པ་ཚོད་ཅིག་བྲལ་བ་བག་ཕེབས་པའི།།
འཚོ་བའི་རླབས་ཀྱི་རི་མོ་སེམས་སུ་མངོན།།
2021 6 28 མཚན་གུང་དུ་བྲིས།
དྲན་རྟོག་རང་ཡན་མ།
དྲན་རྟོག་རིང་ཡང་ཐུང་ཡང་འཆར་སླ་བས།།
འདས་པའི་ལོ་ཟླའི་གཟུགས་བརྙན་ཞེ་རུ་མངོན།།
སྐྱོ་ལ་དངན་པ་འཐེན་བཞིན་ཡིད་འོང་ཞིག།
མཐོང་བ་པད་མའི་ཆུ་ལས་མཇལ་ཐེངས་མང་།།
དྭངས་མོའི་ཤེལ་གྱི་མདོག་ལ་སྐྱོ་གར་འཁྱུད།།
ལས་མཐུན་ཟླ་བའི་འཛུམ་ཞལ་དྲན་མ་ཐག།
ཐོལ་བྱུང་དགའ་བ་ཚོགས་ལ་སྒྱུ་འཕྲུལ་གྱི།།
པི་ཝང་མངོན་པ་དགའ་བ་ལས་ཀྱིས་མཇལ།།
ཞོགས་པའི་མཐོང་བ་རབ་རིབ་སྒྲིབ་པ་དབེན།།
སྒེའུ་ཁུང་སྔོན་ནས་ཚོར་བྱུང་རླབས་རིས་རྒྱུད།།
ངག་ཏུ་ཐོགས་པ་སྲིད་པའི་སྙན་དབྱངས་ཤིག།
ལས་སྐལ་སྨོན་ལམ་གཅིག་གི་ཟུར་དུ་འཁྱིལ།།
དམིགས་མེད་བརྟེན་གྱི་ཡུལ་ལ་ཆ་མཉམ་པ།།
འཁྲབ་གཞུང་བསིལ་བ་ཐོགས་པ་ཅི་ཡང་རེག།
སྨུག་པ་ལང་ལོང་བཞིན་དུ་མཛེས་སྡུག་བཀྲ།།
ཟོལ་མེད་འགྲོས་ཀྱི་རིམ་པ་ལས་ཀྱིས་མྱོང་།།
ནང་སེམས་ཚལ་དུ་བཞད་པ་པད་མའི་འབྲུ།།
གཡུ་སྦྲང་འཁོར་ལྡིང་བྱེད་ནས་མ་བཅོས་པ།།
བརྩེ་བའི་བཅུད་དང་ཡང་སྙིང་དང་དུ་ལེན།།
ནམ་ཡང་དྲན་པའི་གཏིང་དུ་ཡང་ཡང་རྡོལ།།
ལྗོན་པའི་ཚོགས་སུ་རི་དྭགས་སྣ་ཚོགས་འདུ།།
མཐའ་ཡས་ཀློང་དུ་ངག་གི་བརྩེ་བ་ཆགས།།
སྙིང་དུ་སྡུག་པའི་དྭངས་གཙང་གཞིས་ཁྱིམ་ལ།།
བརྒྱ་ཕྲག་བརྒལ་བའི་ཡིད་འོང་ད་དུང་འཁྱིལ།།
བས་མཐའི་འཕྲིན་པ་ནང་དུ་ཐ་སྙད་འཚང་།།
ཡིད་མཐུན་ལྷ་མོའི་ངག་སྨྲ་ཡིད་དུ་བཏེགས།།
དོན་དུ་ཅི་ཞིག་ཡིན་པ་ཚོར་བས་བསྐྱོམས།།
མི་རྟག་སྤྲིན་པ་ཐར་ཐོར་སེམས་སུ་གསལ།།
2021 7 4 ཕ་ཡུལ་ནས།
ཟླ་བ་ལྷ་མོའི་འཛུམ་ཞལ།
ནམ་ཟླའི་འཕྱོང་རྒྱས་ཤིག་གི་བར་གསེང་དུ།།
བསིལ་གྲིབ་ཡང་ཡང་ལྡང་བ་ལས་ཀྱིས་རེག།
སྣ་ཚོགས་སེམས་ཀྱི་སྣང་བ་གང་ཤར་མ།།
ལྷིང་འཇགས་ནང་གི་འཛུམ་པའི་ཞལ་རས་དེ།།
མ་བཅོས་ཡིད་འོང་ཁྲོད་དུ་ལྷག་པར་གསལ།།
དྲན་པའི་གཏིང་དུ་མེ་ཏོག་རྐང་གཅིག་ཡིན།།
སྒེའུ་ཁུང་ཡོལ་བ་ཕྱི་ནང་གཉིས་ཀྱི་མཚམས།།
ཤེལ་དཀར་མེ་ལོང་ངོས་སུ་ཟླ་བའི་རླབས།།
མཐོང་བ་ལན་གཅིག་མིན་པ་ཇི་སྙེད་ཅིག།
ཚོར་བྱུང་ཟླ་བའི་འཛུམ་པ་གསལ་ལེར་མངོན།།
སྨོན་ལམ་བརྒྱ་དང་སྟོང་གི་རྣམ་སྨིན་ཞིག།
ཡིད་ཀྱི་དབུས་སུ་མངོན་དུས་སུ་ཞིག་དྲན།།
དྲན་པ་ཆུ་མིག་དགུ་སྒྲིག་མཛེས་ཤིང་སྡུག།
ཟླ་བ་ལྷ་མོའི་འཛུམ་ཞལ་ཡང་ཡང་འཁོར།།
སྲིད་པའི་དཔང་དུ་བཞད་པ་ལན་འདི་ལ།།
རྣམ་དག་ཚིག་གི་འདབ་མ་ཡིད་དུ་བཞད།།
ངག་རིག་སྣ་ཚོགས་དཀྲོལ་ནས་དེ་རིང་སྟེ།།
ཉམས་ཀྱི་འགྱུར་ཁུག་དྲོན་མོ་གང་ལ་དཀྲོལ།།
ཞེ་སྙིང་གཏིང་དུ་དཀྲུགས་པའི་སྣང་བ་ལ།།
སྨིག་དྲུག་ཇི་བཞིན་འཛོམས་པ་ང་ཡིས་སྨོན།།
2021 6 25 རང་ཤག་ནས།