མདའ་བཙན་པོར་ཕུལ་བ། | སྙན་བུ།

Original 念布念布文学 2021-06-20 10:47

སྙན་ངག

མདའ་བཙན་པོར་ཕུལ་བ།

སྙན་བུ།

མི་ཚོགས་ཀྱི་དབུས་ན་མྱུར་མོར་འགྲོ་གིན་འདུག

བླ་བྲང་གི་མཇལ་བ་མང་པོ་འཚང་ཁ་ཤིག་ཤིག་བྱེད།

ཕྲུ་གུ་གཉིས་ལག་མགོར་ཁྲིད་ནས་འགྲོ་གིན་འདུག

ཉི་འོད་འོག་གི་ཨ་ཕ་དེ་སྙན་ངག་པ་ཞིག་ཡིན་ཟེར།

ངའི་ཡ་ཐོད་ཀྱི་མིག་ཟུང་འདིས་དེ་མ་ཐག་ངོས་ཟིན་སོང་།

མི་ཚོགས་སྟོང་འདུས་ཁྲོད་ནས་སྙན་ངག་པ་ཞིག་ངོས་ཟིན་སོང་།

དོན་དམ་ངའི་མིག་ཟུང་གིས་ངོས་ཟིན་པ་ཡང་མིན་ཏེ།

ཁེར་རྐྱང་གི་ཟིལ་ཤུགས་དེས་མི་གཞན་པ་ཚང་མ།

ངའི་མཐོང་ཡུལ་ནས་མི་སྣང་བར་བཟོས་སོང་།

གོ་ལ་ཆུང་ཆུང་འདིའི་སྟེང་གི་སྙན་ངག་པ་ཚོ་སྙིང་རེ་རྗེ་ཨང་།

ཡང་སྒོས་སུ་རྣོ་ལྕགས་ཀྱིས་བསྐོར་བའི་དུས་རབས་འདི་འདྲ་རུ།

ཁོ་ཚོས་བློས་སུ་གཏོང་མ་ཐུབ་པས་རྒྱང་རིང་འགྲིམས་མ་ཐུབ།

ཁོ་ཚོས་ངོ་རྒོལ་བྱེད་མ་ཐུབ་པས་གསར་གཏོད་བྱེད་མ་ཐུབ།

ཁོ་ཚོས་ཐ་ན་ལྷག་བསམ་རྣམ་དག་གིས་འཛུམ་ཆུང་ཞིག་ཀྱང་སྟོན་མ་ཐུབ།

“རང་དབང་གི་བཙན་གཏམ་ཞིག་བརྗོད་དགོས་ན་སྙན་ངག་པས་བརྗོད་དགོས།”

ངེས་པར་འདི་འདྲ་ཞིག་ཡིན་པའི་ངེས་པའང་མེད་དེ།

ཕྲུ་གུ་གཉིས་ལག་མགོར་ཁྲིད་ནས་མཇལ་སྐོར་དུ་འགྲོ་བའི་ལམ་བར་དུ།

ཁེར་རྐྱང་གི་ཟིལ་ཤུགས་ཀྱིས་མི་ཚོགས་ཀྱི་མགོ་བོ

ཞབས་འོག་ཏུ་གནོན་གྱིན་གནོན་གྱིན་སོང་ཡང་ཅིས་མི་ཆོག

ངས་ལྷ་ཁང་ནང་གི་གཙོ་སྐུ་དག་ལ་ཐོད་པ་གཏུགས་ནའང་།

ང་རང་དད་པ་སྐྱེ་ས་དངོས་ནི་ཐ་སྙད་དང་ཐ་སྙད་ཀྱི་བྱིན་རླབས་རེད།

གལ་སྲིད་ང་རང་ཚོའི་ལུས་པོ་འཇོག་སའི་འཇིག་རྟེན་འདི་ན།

དམག་འཁྲུག་མེད། ཆོས་ལུགས་མེད། རྒྱལ་ཁབ་ཀྱང་མེད་ན།

ད་གཟོད་མི་རྣམས་ཀྱི་གདོང་ན་སྙན་ངག་དྭངས་མ་ལྟ་བུའི།

འཛུམ་བག་ཅིག་མཐོང་རྒྱུ་ལོས་ཡོད་འདྲ་འོ་ཞིག་སྙམ་འོངས།

དེ་བས། ཅིས་ཀྱང་ཡིད་ཆེས་བྱས་ཆོག་ས་ཞིག་བཙལ་དགོས་ན།

ཐ་སྙད་ལ་བློ་སེམས་དཀར་པོའི་སྙན་ངག་པ་ཞིག་ལ་བསྒུག་དགོས་སོ། །

【རྒྱབ་ལྗོངས】ན་ནིང་གི་དབྱར་ཁ་ཞིག་ལ་ངའི་ཁྱིམ་མི་ཡོངས་བླ་བྲང་ལ་འབྱོར་མ་ཐག མཇལ་བ་ཁྲི་སྟོང་མང་པོའི་ཁྲོད་ནས་ངས་མདའ་བཙན་པོ་མཐོང་སོང་། ཁོས་རང་གི་ཕྲུ་གུ་གཉིས་ཀ་ལག་མགོར་འཇུས་ནས་འཚང་ཁ་ཤིག་ཤིག་གི་མི་ཚོགས་ཁྲོད་མདུན་དུ་སྐྱོད་བཞིན་འདུག ངེད་གཉིས་ཀྱིས་ཡུན་ཧ་ཅང་ཐུང་བའི་དུས་ཚོད་ཅིག་ལ་ཕན་ཚུན་ཁ་བརྡ་ཉུང་ཙམ་བྱས་རྗེས་རང་རང་སར་གྱེས་པ་ཡིན། ཕྱིས་སུ་ངའི་དྲན་འཛིན་གྱི་ངོས་སུ་མི་ཚོགས་ཁྲོད་ནས་སྙན་ངག་པ་ཞིག་མཐོང་བའི་རྣམ་པ་དེ་ཅིས་ཀྱང་བརྗེད་ཐབས་མེད་པས། སྙན་ངག་ཅིག་ཡང་ཡང་བློས་བསླངས་བྱས་པ་ཡིན། མི་ཚོགས་ཁྲོད་ཀྱི་སྙན་ངག་པ་དེ་ཇི་འདྲའི་སྙིང་དུ་སྡུག་པ་ཞིག་རེད་ལ། ཇི་འདྲའི་ཁེར་རྐྱང་དང་སྙིང་རྗེ་རུང་བ་ཞིག་ཀྱང་རེད་ཨང་། ཁ་སང་སྙན་ངག་འདི་འདྲ་ཞིག་བྲིས་ནས་མདའ་བཙན་པོར་བསྐུར་བ་ན། ཁོང་གིས་ང་ལ་<སྲོད་ཁའི་ཧྲག་བར་ཞིག་ནས་བླ་བྲང་ལ་འབྱོར>ཞེས་པའི་སྙན་ངག་ཡག་པོ་ཞིག་བསྐུར་བྱུང་། སྙན་ངག་འདི་བཀླགས་རྗེས་ངས་ཉིན་དེའི་སྙན་ངག་པ་ཁོང་གི་སེམས་ཁམས་རྟོགས་ཐུབ་པ་བྱུང་སོང་ལ། ངས་མི་ཚོགས་སྟོང་འདུས་ཁྲོད་ནས་སྙན་ངག་པ་ཁོང་གཅིག་པུ་མཐོང་བའི་སྐབས་ཐོག་དེའི་དགའ་སྣང་དྲག་པོ་དེ་སླར་ཡང་མྱོང་ཐུབ་པ་ཞིག་བྱུང་སོང་།

སྲོད་ཁའི་ཧྲག་བར་ནས་བླ་བྲང་ལ་འབྱོར།

མདའ་བཙན་པོ།

ང་ཟེར་བ་མཚོན་བྱེད་ཀྱི་ལུས་པོ་འདི་དྲུད་ནས

ནམ་འཆི་ཆ་མེད་ཀྱི་སྲོག་རྟ་རྔ་ཙམ་པོ་རུམ་ནས

ཤི་རྗེས་ཟེར་བའི་མིག་བཙུམ་པ་ལྟ་བུ་ཞིག་ཡིད་ལ་བཟུང་ནས

ད་བར་ཏུ་ཟེར་བའི་ཤུལ་ལམ་བློས་མི་ཟིན་པ་ཞིག་ཁྱེར་ནས

གསོན་ངོགས་ཀྱི་ལུག་ཆུང་འཚོ་བྱེད་ལྟ་བུའི་མིག་གཉིས་ཀ་ཕྱེས་ནས

ལུས་ཀྱི་གླ་བ་ལྟ་བུའི་ཡན་ལག་དག་འགུལ་ནས

གཉེན་གྱི་སྐྲ་ལོ་དག་མཐོ་ས་ནས་གཟེངས་སུ་བཅུག་ནས

ཆགས་སྡང་རྒྱ་མ་གང་བོ་གདུ་རུ་བཅུག་ནས

ཉོན་མོངས་ཤ་རྒྱུས་ལྟ་བུ་དེ་ལུས་ལ་བཅིང་ནས

ཉི་འོད་ཀྱི་འབྲུ་དག་འཚིག་ཤུལ་གྱི་ས་སྲོད་ཅིག་ལ