དྲག་རྩལ་གྱི་རྩོམ་ཡིག་ཚན་པ་གཉིས་འོས་སྦྱོར།

                                                -དྲག་རྩལ།    

       མཛེས་ཁོག་གི་ནམ་མཁའ་ནི་དག་ཅིང་གཙང་ལ་ཁོ་ར་ཁོར་ཡུག་ཀུན་ནས་སྔར་ལས་ལྷག་པའི་བཀྲག་མདངས་ཤིག་མངོན་འདུག རུ་སྐོར་འདིར་ཕལ་ཆེར་དུད་ཁྱིམ་བཅུ་ཁ་ཞིག་ཡོད་ལ། དུད་ཁྱིམ་རེ་རེའི་ཁང་ཀླད་ནས་སྔོ་ལྷོག་ལྷོག་གི་དུ་བ་འཕྱུར་ཀྱིན་འདུག་པས་ཡུལ་ལུང་འདིར་སྔར་ལས་ལྷག་པའི་མཛེས་སྡུག་བླ་ལྷག་ཅིག་བསྐྲུན་འདུག ཁྱིམ་ཚང་རེ་རེའི་མཐའ་འཁོར་གྱི་གནས་གང་རུང་ན་སླས་ར་རེ་ཡོད་ཅིང་། བཞོན་མ་སྐོར་རེས་སླས་ར་ནས་ལས་ཀ་ཚགས་ཏེ་ཕན་ཚུན་བར་དགོད་ཁ་རྩེ་ཞོར་རང་རང་གི་ཁྱིམ་ཚང་གི་ཕྱོགས་ལ་བུད་སོང་། འདི་ནི་དངོས་གནས་མཚར་སྡུག་རྣམ་པར་བཀྲ་བའི་དབྱར་གཞུང་གི་ཞོགས་པ་ཞིག་རེད།

       ཁོ་ད་དུང་ཡང་མལ་གདན་འཇམ་པོའི་ཁུག་ན་འགྲེ་ལྡོག་རེ་རྒྱགས་ཀྱིན་ཉལ་ནས་འདུག་གཉིད་འདང་ཡོད་ན་འང་ཕར་བལྟས་ཚོད་ཀྱིས་ཡང་བསྐྱར་སྐྱིད་པའི་རྨི་ལམ་ཞིག་ལ་རོལ་འེ་ཐུབ་ཀྱི་རེ་བ་བྱེད་ཀྱིན་པ་འདྲ། ཅུང་ཙམ་འགོར་རྗེས་ཁོའི་ཨ་མ་ལགས་ཀྱིས་སླས་རའི་ནང་གི་བྱ་བ་དག་ལས་ཚར་ཏེ་ཁང་སྒོ་ཕྱེས་ནས་ནང་དུ་འཛུལ་ཡོང་། ཨ་མས་ཐེངས་དུ་མར་ཁོའི་མིང་ནས་བོས་དེ་ཡར་ལོངས་ཞེས་ཟེར་ཀྱིན་འདུག ཡིན་ནའང་ཁོའི་གདོང་ལ་ཧ་ཅང་མི་འཐད་པའི་ཉམས་ཤིག་མངོན་ཀྱིན་ཡང་བསྐྱར་འགྲེ་ལྡོག་རེ་རྒྱགས་ཡོང་། ངས་བལྟས་ན་ཁོ་ནི་དངོས་གནས་མི་སྒྱིད་ལུག་ཅིག་རེད། ཡུད་ཙམ་ལ་ཨ་མས་ཀྱང་འབོད་འཚམ་བཞག་སོང་། ཁོ་མ་འདུས་པའི་བཟའ་མི་གང་བོའི་གཏུལ་མ་རེ་ཟ་གྱིན་འདུག འོན་ཀྱང་ཁོ་ད་དུང་ཡང་སྔར་ལྟར་འགྲེ་ལྡོག་རེ་བྱས་ནས་འདུག ཁྱིམ་མི་ཚོས་ཁ་བརྡ་ཉག་ཉོག་རེ་བྱེད་པ་ཁོས་གཉིད་འོག་ནས་ཀྱང་ཆད་ཆོད་རེ་གོ་ཀྱིན་འདུག 

     ཕལ་ཆེར་དུས་ཚོད་བཅུ་བར་སླེབས་ལ་ཉེ། ཁོས་ལག་གཉིས་ཀྱིས་མིག་ཕུར་ཕུར་བྱེད་ཀྱིན་ཉལ་གདན་ལས་མགོ་བཀྱགས་བྱུང་། ཁོས་མགོ་བཀྱགས་ཏེ་ཡུད་ཙམ་བསམ་བློ་བཏང་རྗེས་གཞི་ནས་བསམ་ཤེས་པ་ལྟར་མྱུར་མོར་རྐང་སྣམ་གྱོན་ཞིང་སྟོད་ཐུང་རྒྱབ་ལ་གཡུག་ཙམ་བྱས་ནས་ལྕོག་ཆུང་དེའི་སྒོར་བུད། 

     ཁོ་ཇ་ཁང་དུ་སླེབས་རྗེས་ཨ་ཕ་སྔ་མོ་ནས་ལས་ཀར་སོང་ཟིན། ཨ་མ་པུས་མོར་འགྲོ་རྒྱུར་གྲ་སྒྲིག་བྱས་ནས་འགྲོ་ལ་ཉེ། ཨ་ཕྱི་ལགས་ཀྱིས་“ཇ་ད་དུང་ཚ་མོ་རེད། གཏུལ་མ་ཞིག་ཟོས་ན་ལུས་པོར་བཟང་་་་་་་་་"ཟེར། 

      འོན་ཀྱང་ཁོས་"ངས་ནངས་ཇ་འཐུང་ན་མི་འདོད་གི་་་་་"ཟེར་བཞིན་གཞོག་ཅིག་ནས་ས་ལ་བསྡད་སོང་། 

       དེ་རིང་གི་མཁའ་དབྱིངས་སུ་སྤྲིན་པ་བྱེའུ་མགོ་ཙམ་ཡང་མེད་ལ། ཚ་ལམ་ལམ་གྱི་ཉི་འོད་ཅིག་གིས་ས་འཛིན་སྒེག་མོ་གསེར་འོད་ལྡན་པ་ཞིག་ཏུ་བསྒྱུར་ཞིང་མེ་ཏོག་སེར་ཆེན་གྱིས་གསེར་འོད་དེ་སྔར་ལས་བཀྲག་མདངས་ལྡན་པ་ཞིག་ཏུ་བྱས། ཁོ་ཚང་གི་སྒོ་ཁ་ན་ད་ནངས་ཨ་མས་བཞག་པའི་པུས་མོ་ཁྲ་ཁྲ་ལམ་ལམ་དང་ཕྱུར་བ་ཉུང་ཙམ་རེ་ཡོད་ལ། ད་དུང་འཕྲུལ་རྟ་རེ་དང་། ཉི་གློག་གི་ཤེལ་ལེབ་རེ་འང་ཉི་མར་བཞག་འདུག ཁོའི་ལག་གཡས་སུ་གདུགས་སེར་ཁྲ་ཞིག་བཟུང་ཞིང་ཅིག་ཤོས་སུ་སྟན་འགའ་བཟུང་སྟེ་ཁང་སྒོར་བུད་བྱུང་། ཁོའི་དལ་ཞིང་སྒྱིད་ལུག་པའི་གོམ་པ་དེ་ར་བའི་དཀྱིལ་དུ་རྒྱུན་པར་དྲང་མོར་འགྲེང་བའི་གདུགས་ཡུའི་ཕྱོགས་སུ་བསྒྱུར། ཁོས་ཅུང་ཆེ་བའི་གདུགས་དེ་གདུགས་ཡུ་རུ་བརྟན་པོར་བཅིངས་རྗེས་གྲིབ་མའི་གནས་སུ་སྟན་དག་བཏིངས་སོང་། སྐབས་དེར་ཁྱིམ་ཚང་གང་བོར་ཁོའི་ཨ་ཕྱི་དང་ཚ་མོ་མ་གཏོགས་ཚང་མ་ལས་ཀར་སོང་ཟིན། ཁོ་ཡང་བསྐྱར་ཁྱིམ་དུ་འཛུལ། 

 སྐར་མ་འགའ་ལས་མ་འགོར་བར་ཁོའི་ལག་ཏུ་《བོད་ཀྱི་ལོ་རྒྱུས་གླེང་བའི་གཏམ།》སྟེ། རྒྱལ་མོ་འབྲུག་པས་བརྩམས་པའི་དཔེ་དེབ་དེ་དང་འབྲི་དེབ་སེར་པོ་གཡས་སུ་སྣུམ་སྨྱུག་འབྱར་ཡོད་པ་ཞིག་བཟུང་ནས་སྒོར་བུད་ཡོང་། ཁོའི་རྗེས་སུ་ཁོའི་ཨ་ཕྱི་དང་ལོ་གཅིག་ཟླ་བ་ཁ་ཤས་ལས་མེད་པའི་ཚ་མོ་ཆུང་ཆུང་གཉིས་ཀ་ཡང་བུད་ནས་ཚང་མ་གདུགས་ཀྱི་ཕྱོགས་སུ་སོང་། ཁོ་ཚོ་ཚང་མ་བེའུའི་ཀོ་བས་བྱས་པའི་གདན་ཐོག་ཏུ་བསྡད་ཅིང་། ཨ་ཕྱིས་གཡས་ལག་ཏུ་འཁོར་ལོ་བསྐོར་ཞིང་གཡོན་ལག་གི་ཕྲེང་བ་ཡང་དེ་དང་མཐུན་པའི་འགྲོས་ཀྱིས་བསྒྲེངས་ཀྱིན་འདུག ཁོས་དཔེ་དེབ་ཀྱི་ཁ་བསྒྱུར་དེ་བོད་ཀྱི་རྒྱལ་རབས་རིམ་བྱོན་གྱི་ལོ་རྒྱུས་ལ་བལྟ་ཀྱིན་འདུག་ལ། ཞོར་དུ་འགྲམ་ན་བཞག་པའི་འབྲི་དེབ་སེར་པོ་དེ་པང་དུ་བླངས་ནས་ཟིན་བྲིས་རེ་འང་འདེབས་ཀྱིན་འདུག ཁོའི་སློབ་སྦྱོངས་བྱེད་སྟངས་ལ་ཧ་ཅང་ནན་ཏན་གྱི་ཉམས་ཤིག་མངོན་འདུག་མོད། འོན་ཀྱང་ཚ་མོ་ཆུང་ཆུང་དེས་ཁོའི་འབྲི་དེབ་ཀྱི་སྣེ་ནས་འཐེན་ཞིང་སྣུམ་སྨྱུག་འཕྲོག་རྩིས་སོགས་བྱེད་པས། འདི་ལྟ་བུའི་ནན་ཏན་གྱི་རྣམ་པ་འང་ཡུད་ཙམ་རེ་མ་གཏོགས་རྒྱུན་འཁྱོངས་མི་ཐུབ། ཅུང་ཙམ་འགོར་རྗེས་ཁོ་རང་ཡང་བསྐྱར་ཁྱིམ་དུ་འཛུལ་སོང་། སྒོར་བུད་དུས་ཁོའི་ལག་ཏུ་ཀུ་ཤུ་ཁ་པར་ཞིག་དང་སྒྲ་སྒམ་ནར་མོ་ཞིག་ཀྱང་བཟུང་འདུག ཁོའི་ཁ་པར་དང་སྒྲ་སྒམ་གཉིས་སོ་སྔོན་གྱིས་འབྲེལ་རྗེས། ཁ་པར་གྱི་ཚོད་འཛིན་ལ་བརྟེན་ནས་སྒྲ་སྒམ་ལས་དྭངས་ཤིང་རྣར་འཇེབས་པའི་གླུ་དབྱངས་སྙན་མོ་རེ་གྲགས་ཤིང་། སྐབས་རེར་ཁོས་ཀྱང་ཁ་པར་ལས་མཐོང་ཐུབ་པའི་གླུ་ཚིག་ལ་བརྟེན་ནས་གླུ་དབྱངས་དང་འགྲོས་མཐུན་པའི་མཉམ་ལེན་བྱེད། ཁོ་ཚོས་འདི་ལྟར་དུས་ཚོད་བཅུ་གཉིས་ལ་ཅི་ལྟར་སླེབས་པ་འང་ཤེས་མ་སོང་། 

       ཉི་མས་ཚ་ཟེར་གདུགས་ཀྱིས་ཀྱང་མ་ཁོག་པར་ལུས་ཡོངས་དྲོད་ལམ་ལམ་དུ་བཏང་། ཁོ་ཁྱིམ་དུ་འཛུལ་ནས་ཡུན་རིང་ཙམ་འགོར་སོང་ལ། ཁོ་ཚང་གི་ཁང་ཀླད་ནས་དུ་བ་འཕྱུར་ནས་ཀྱང་ཅུང་འགོར་སོང་། ཡུད་ཙམ་ནས་ཁོའི་ལག་གཉིས་ཀྱིས་བ་མ་ཞིག་ལ་འཇུས་ཏེ་སྒོར་བུད། བ་མའི་སྟེང་དུ་ཅ་ནེ་འགའ་དང་མར་བསྡུས་པའི་ཟེའུ་ཆུང་ཆུང་ཞིག་ཀྱང་བཞག་འདུག ཁོས་ཨ་ཕྱིའི་མདུན་དུ་བ་མའི་ཁ་ཕྱེ་དུས་དེ་ལས་རླངས་པ་ལྷོག་ལྷོག་ཏུ་འཕྱུར་ཡོང་། མ་གཞི་བ་མའི་ནང་གི་ཟས་རིགས་ནི་གོ་རེ་ཡིན་འདུག ཁོས་ཅ་ནེ་རེ་རེའི་ནང་དུ་གོ་རེ་གཉིས་གསུམ་རེ་བཞག་རྗེས་ཨ་ཕྱིའི་ལག་ལ་གཏད་སོང་། ཨ་ཕྱིས་ཀྱང་ཅི་ཞིག་ཧ་གོ་བ་ལྟར་ཅ་ནེའི་ནང་དུ་མར་འཕང་ཞིང་། ཁོ་ཚོས་ཉི་འོད་ཀྱི་དྲོད་འཇམ་འོག་ནས་དངོས་གནས་མངར་ལ་ཞིམ་པའི་དྲོས་ཇ་ཞིག་འཐུང་སོང་། 

     ཉིན་གཅིག་ཅི་ལྟར་འདས་པ་དངོས་གནས་མི་ཤེས། དུས་ཚོད་ནི་སྐད་ཅིག་གིས་བཞུར་འགྲོ། ཟ་མ་ཟོས་ཚར་རྗེས་ཚ་མོ་གཉིད་དུ་ཡུར་སོང་། ཁོ་ཡང་འཁྱར་འཁྱོར་ངང་སོང་སྟེ་བཅའ་ལག་དག་ཁྱིམ་དུ་བསྡུས་རྗེས་སྟོད་ཐུང་ཞིག་བཟུང་ནས་འདུགས་འོག་ཏུ་སླེབས་བྱུང་། སྐར་མ་འགའ་ལས་མ་འགོར་བར་ཁོ་འང་གདུགས་འོག་ནས་གཉིད་དུ་ཡུར་སོང་། 

    དུས་ཚོད་ཅི་ཙམ་འགོར་བ་མ་ཤེས་མོད། རླུང་དམར་ཞིག་གིས་ཁོའི་གཉིད་དཀྲོགས།

    ཁོས་ས་ལྟ་ཡུལ་ལྟ་ཞིག་བྱས་ཏེ་ཨ་ཕྱི་ལ།"ཆར་བ་འབབ་ན་ཐང་གི་་་་་་ང་ཚོས་པུས་མོ་དང་གོན་རྒྱུ་དག་ཁྱིམ་དུ་བསྡུ་འམ་ཅི་བྱ།" ཨ་ཕྱིས་"མྱུར་མོར་བསྡུས་ན་བཟང་འདུག་་་་་་་་ཆར་བ་ཅུང་མི་འགོར་བར་འབབ་རྒྱུ་རེད་་་་་་"ཟེར། ཁོས་མྱུར་མོར་བསྡུ་དགོས་པ་ཚང་མ་ཁྱིམ་དུ་བསྡུས་ཟིན་ཞིང་། ཁ་པར་ཕྱེས་ཏེ་དུས་ཚོད་ལ་བལྟ་དུས། དུས་ཚོད་སྔ་མོ་ནས་བཞི་དང་ཕྱེད་ཀར་སླེབས་ཟིན། ཁོས་དུས་ཚོད་འདིར་བེའུ་འདོག་དགོས་པ་ལོས་ཤེས། ཡིན་ཡང་ཆར་རྗེས་ལ་སྒུག་རྒྱུ་ལས་ཐབས་མི་འདུག་པས་ཁོས་སྒོ་བརྒྱབ་སྟེ་ཁྱིམ་དུ་འཛུལ་སོང་། 

     དུས་ཚོད་ཕལ་ཆེར་ལྔ་པར་སླེབས་ཟིན། ཡིན་ཡང་ཆར་བ་སྔར་བཞིན་འཚམ་མི་འཇོག ཅུང་འགོར་རྗེས་ཁོ་ཡར་ལངས་སྟེ་སྒོར་འབུད་མགོ་བརྩམས་ལ། ཁོས་ཆུ་ལྷམ་ཡུ་རིང་དེ་རྐང་པར་གྱོན་ཞིང་ཆུ་ལྭ་དེ་འང་རྒྱབ་ལ་གྱོན་སོང་། མཇུག་མཐར་མགོ་ལ་ཞྭ་ནག་པོ་ཞིག་གྱོན་ནས་སྒོར་བུད། བེའུ་དག་ར་བའི་ནང་དུ་བཙུད་ཚར་རྗེས་རེ་རེ་རང་གནས་སུ་བཏགས་ཤིང་། དེ་ནས་ཡ་རུ་གཅིག་ཡོད་པ་དེ་བཙལ་དུ་སོང་། ཡ་རུ་ཨ་ནེ་ལགས་ཀྱིས་མོ་ཚང་གི་སླས་སུ་བཏགས་འདུག ཁོས་གཡོན་ལག་ཡ་རུའི་འཆར་ལོངས་ནས་འཇུས་ཤིང་གཡས་ལག་ཡ་རུའི་རྔ་མར་འཇུས་ཏེ་རང་གནས་སུ་ཁྲིད་དེ་བཏགས། བེའུ་ཆུང་ཆུང་ཞིག་ཡོད་པ་དེས་ཀྱང་ཕྲ་ལ་ཉམས་ཞན་པའི་ངུར་སྒྲ་འབྱིན་བཞིན་ར་བའི་རྩར་སླེབས་འདུག དེ་ནི་བེའུ་འདྲོགས་དགའ་ཆེ་བ་ཞིག་ཡིན་པས། ཁོས་ཨ་ནེ་ཚང་གི་གྲྭ་བ་དེར་བརྡ་ཞིག་བྱས་ཏེ་བེའུ་འཛིན་དགོས་པར་གདམས། ཁོ་གཉིས་བེའུ་འཛིན་པའི་རྩེད་མོ་ལ་རོལ་རན་སོང་། བེའུ་དེ་ནི་དངོས་གནས་འདྲོག་དགའ་ཆེ་བ་ཞིག་རེད། རྩར་སླེབས་ལ་ཉེ་དུས་བྲོས་འགྲོ ཡང་བསྐྱར་འཛིན་འེ་ཐུབ་བལྟས་ན་འང་ཧ་ཅང་དཀའ། དུས་ཡུན་རིང་ཙམ་ལ་ཁོ་གཉིས་པོས་བཟུང་ཡང་མ་ཟིན་པས། ཁོ་གཉིས་ཀྱང་ཐབས་ཟད་དེ་བེའུ་དེར་དམོད་མོ་བྱེད་ཀྱིན་སར་བསྡད་དེ་བསྒུག གང་ལྟར་མཇུག་དུ་ཁོས་མ་བསམ་ས་ནས་ཟིན་སོང་། བཞོ་རྒྱུ་འགའ་ཡོད་པ་ཚང་མ་ཚང་ཟིན། དེ་བས་ཁོ་ཡང་ཁྱིམ་དུ་སོང་སྟེ་ཨ་ཕྱི་དང་ཚ་མོ་གཉིས་ལ་ཇ་སྐོལ། ཚང་མའི་གཏུལ་མ་རེ་ཟོས་ཏེ་དགོང་ཇའི་ཚུགས་ཀ་བྱས། 

    དགོང་མོའི་དུས་ཚོད་བརྒྱད་དགུ་ལ་སླེབས་དུས་ཁྱིམ་མི་ཚང་མ་ཐོན་ཡོང་། ཁོ་ཚོ་སླེབས་རྗེས་ཁོའི་ལས་ཀ་ཡང་ཇེ་ཡང་དུ་སོང་བས་ཁོ་རང་གི་ཉལ་ལྕོག་ཏུ་སོང་སྟེ་བརྙན་འཕྲིན་ལ་བལྟས། ཨ་ཅེས་ནུབ་ཇ་བསྐོལ་ཚར་རྗེས་འཐུང་དུ་ཡོང་དགོས་པར་གདམས། བཟའ་མི་གང་བོས་འུར་རྒྱགས་ཞོར་དུ་ནུབ་ཇ་འཐུང་བས། ཇ་དེམ་གང་ཡོད་པ་དེ་འང་ཅི་ལྟར་ཚར་བ་མ་ཤེས། དུས་ཚོད་བཅུ་གཅིག་ལ་སླེབས་པར་སྐར་མ་ཁ་ཤས་ལས་མེད་དུས་ཚང་མ་རང་རང་གི་ཉལ་ཁང་དུ་སོང་སྟེ་རྨི་ལམ་གྱི་ཞིང་ཁམས་སུ་ཆས་སོང་། ཁོའང་རང་མལ་དུ་སོང་ཞིང་། ཁོའི་དམའ་འབྲིང་གི་འདུག་གྲོགས་ཀྱིས་སྦྱིན་པའི་སྟེགས་སྒྲོན་དེ་བཀར་ནས་འབྲི་དེབ་ཅིག་གི་ཁ་བསྒྱུར་ནས་བལྟས་ཤིང་། པར་ཁུག་ཅིག་ཡོད་པ་དེ་འང་བསློགས་བསློགས་ནས་སྔར་གནས་སུ་བཞག ཡུད་ཙམ་འགོར་རྗེས་ཁོས་མགོ་རང་ཤུགས་ཀྱི་ཐུར་དུ་ལྷུང་ཡོང་བས། ཁོས་མྱུར་མོར་སྟེགས་སྒྲོན་གཟིམས་ནས་གཉིད་ཀྱི་ལས་ལ་བརྩམས་སོང་། 

    འདི་ལྟར། ཁོའི་ཉིན་གཅིག་ཡོངས་སུ་མཇུག་སྒྲིལ་སོང་། 

                       ༢༠༢༡-༧-༢༦ཉིན་ཀྱི་ཕྱི་དྲོ་༣:༣༨ལ་ཡོངས་སུ་བྲིས་ཚར།

                                                      མཛེས་ཁོག་ནས།

                                                     -དྲག་རྩལ།