ཀྲུང་གོའི་གསར་འགྱུར་ཁང་ནས་གནས་ཚུལ་སྤེལ་གསལ། སྤྱི་ཟླ་2པའི་ཚེས་1ཉིན་ཨུ་རུ་སུའི་སྨྱན་སྦྱོར་ཚན་པས་སྤེལ་བའི་གནས་ཚུལ་ལ་གཞིགས་ན། ཉེ་ཆར་ཨ་རིའི་ཙུང་ཐུང་ཨོ་པ་མཱས་ཨ་རིའི་སྐུད་ཡོད་བརྙན་འཕྲིན་གསར་འགྱུར་དྲ་བའི་བཅའ་འདྲི་དང་ལེན་བྱེད་སྐབས། ཨ་རི་ནི་སྤྱི་ལོ་2014ལོའི་ཟླ་2པར་ཝུ་ཁེ་ལན་དུ་བྱུང་བའི་སྲིད་འགྱུར་ནང་ཧུར་ཐག་གིས་ཞུགས་ཡོད་པ་ཁས་ལེན་བྱས་ཡོད་པ་རེད།

ཨོ་པ་མཱས་བཅའ་འདྲིར་དང་ལེན་བྱེད་དུས། ཨུ་རུ་སུའི་ཙུང་ཐུང་ཕུའུ་ཅིན་གྱིས་ཁེ་ལི་མི་ཡ་དང་ཝུ་ཁེ་ལན་གྱི་གནད་དོན་ལ་རང་ཉིད་ཀྱིས་གཏན་འབེབས་བྱས་ཡོད། དེ་ནི་གལ་ཆེའི་འཐབ་ཇུས་གཞན་ཞིག་ལ་བསམ་གཞིགས་བྱས་པ་ཞིག་མ་ཡིན་པར། མའེ་ཏན་གྱི་ངོ་རྒོལ་པའི་བྱ་སྤྱོད་ཀྱི་རྐྱེན་པས་ཁོང་གི་བསམ་བློར་གཡོ་འགུལ་ཐེབས་པ་ཞིག་ཡིན་པ་དང་། དེ་རྗེས་ཝུ་ཁེ་ལན་གྱི་ཙུང་ཐུང་ཟུར་པ་ཡ་ཎུ་ཁེ་ཝེ་ཆི་ཡང་ཝུ་ཁེ་ལན་ནས་ཁ་བྲལ་བར་བརྟེན། ཨ་རི་ད་གཟོད་ཝུ་ཁེ་ལན་གྱི་དབང་ཆ་བར་བརྒལ་བྱེད་པའི་འཕེལ་རིམ་ནང་ཞུགས་པ་ཡིན་ཞེས་གསུངས་ཡོད་པ་རེད།