༈ ཟབ་མོའི་ལམ་གྱིས་རྒྱུད་སྦྱངས་དུལ་བའི་སྡེ། །ཞེས་བསྔགས་པ། སློབ་དཔོན་དུལ་བའི་སྡེ་ནི། རྒྱལ་བའི་བསྟན་པ་ལ་ཞུགས་ནས་སློབ་དཔོན་མཆོག་གི་སྡེ་ཡོངས་འཛིན་དུ་བསྟེན་ནས་སྡེ་སྣོད་གསུམ་ལ་སྦྱངས་ཤིང༌། ཁྱད་པར་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེའི་གདམས་ངག་མངོན་པར་རྟོགས་པའི་རྒྱན་ལ་སྦྱངས་ནས་བྱང་ཆུབ་ལམ་གྱི་རིམ་པའི་གནད་ཐམས་ཅད་ཐུགས་སུ་ཆུད་པར་མཛད། དེ་ནས་བྱང་ཆུབ་ལམ་གྱི་རིམ་པའི་ཉམས་ལེན་ལ་འབད་པས་རྟོགས་པ་ཕུལ་དུ་ཕྱིན་པ་ཐོབ། རྒྱལ་བའི་བསྟན་པ་སྤེལ་བའི་ཕྱིར་རྗེ་བཙུན་བྱམས་པ་མགོན་པོའི་སྐུ་བཞེངས། དེ་ལ་གསོལ་བ་རྩེ་གཅིག་བཏབ་པས།བྱམས་མགོན་གྱི་སྐུ་དེས་གསུང་བྱོན་ནས་བསྟན་པ་དང་སེམས་ཅན་གྱི་དོན་བྱེད་པ་ལ། རྗེ་བཙུན་སྒྲོལ་མ་ལ་གསོལ་བ་འདེབས་དགོས་པས་འཕགས་མ་སྒྲོལ་མའི་སྐུ་བཞེངས་ཞེས་གསུངས་པ་ལྟར་རྗེ་བཙུན་སྒྲོལ་མའི་སྐུ་བཞེངས། དེ་ལ་གསོལ་བ་རྩེ་གཅིག་ཏུ་བཏབ་པས་རྗེ་བཙུན་མ་སྒྲོལ་མས་འཕྲིན་ལས་མཛད་དེ་སྐལ་པ་དང་ལྡན་པ་མང་པོ་ལ་ཤེར་ཕྱིན་གྱི་མན་ངག་རྒྱ་ཆེར་སྤེལ་ཞིང༌། ཁྱད་པར་དུ་ཡང་བསྟན་པ་ཡོངས་རྫོགས་ཀྱི་བདག་པོ་མཁན་ཆེན་ཞི་བ་འཚོ་ལ་གྲོལ་སྡེ་རྣམ་གཉིས་ལས་བྱུང་བའི་མན་ངག བྱང་ཆུབ་ལམ་གྱི་རིམ་པའི་གནད་ཐམས་ཅད་ཤེར་ཕྱིན་གྱི་མདོ་སྡེ་རིན་པོ་ཆེ་དང་སྦྱར་ཏེ་ངེས་པ་གཏིང་ཚུགས་པར་བསྐྱེད་པ་མདོ་རྒྱན་སྦྱར་བའི་མན་ངག་མཐའ་དག་བུམ་པ་གང་བྱོའི་ཚུལ་དུ་ཡོངས་སུ་རྫོགས་པ་གནང་སྟེ་བསྟན་པའི་བདག་པོར་བྱིན་གྱིས་བརླབས་སོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་དུལ་བའི་སྡེ་ལ་གསོལ་བ་འདེབས་ཤིང་བདག་ཉིད་ཆེན་པོ་འདི་ནས་བརྒྱུད་པའི་ལམ་གྱི་རིམ་པ་ལ་བག་ཆགས་ཅི་ཐེབས་བྱའོ། །གྲོལ་སྡེ་རྣམ་གཉིས་དང༌། མཆོག་སྡེ་དུལ་སྡེ་གཉིས་ཏེ་སློབ་དཔོན་བཞི་པོ་འདི་གང་དུ་འཁྲུངས་པའི་ཡུལ་དང༌། རིགས་དང་རུས་གང་ཡིན་པ་དང༌། སྐུ་ཚེ་རིལ་པོའི་མཛད་པ་རྣམ་ཐར་ཞིབ་པ་མ་མཐོང་བས་སླར་རྙེད་ན་འདིར་བསྣན་པར་བྱའོ། ། |
