《སངས་རྒྱས》ཞེས་པའི་གློག་བརྙན་འདི་ནི་རྒྱ་གར་གྱི་འཁྲབ་སྟོན་པ་ཧི་མན་ཤུ●སོ་ནིས་འཁྲབ་སྟོན་བྱས་ཤིང་།མུ་འབྲེལ་བརྙན་འཕྲིན་ཟློས་གར་འདིའི་ནང་དུ་​སངས་རྒྱས་བཅོམ་ལྡན་འདས་ལྷུམས་སུ་ཞུགས་པ་དང་། སྐུ་བལྟམས་པ། བཙུན་མོའི་འཁོར་ཀྱིས་རོལ་བ། རབ་ཏུ་བྱུང་བ། དཀའ་བ་སྤྱད་པ། མངོན་པར་རྫོགས་པར་སངས་རྒྱས་པ། ཆོས་ཀྱི་འཁོར་ལོ་བསྐོར་བ། མྱ་ངན་ལས་འདས་པ་སོགས་ཀྱི་མཛད་པ་མདོར་བསྡུས་བརྗོད་ཡོད།

　　 བྱུང་རིམ།

　　ནང་བ་སངས་རྒྱས་པའི་ཆོས་ལུགས་ནི་སྟོན་པ་ཤཱཀྱ་ཐུབ་པས་གསར་གཏོད་བྱས་པ་ཞིག་དང་དེའི་སྔ་རོལ་ཏུ་ནང་བ་སངས་རྒྱས་པ་མེད་པ་ཞིག་གཏན་ནས་མིན་ཏེ། སྟོན་པ་ཤཱཀྱ་ཐུབ་པའི་སྔོན་ཏེ་འཛམ་གླིང་གི་མི་རྣམས་ཀྱི་ཚེ་ལོ་དཔག་མེད་ནས་རིམ་བཞིན་མར་བྲི་སྟེ་བཞི་ཁྲི་ལ་ཐུག་པའི་ཚེ་སངས་རྒྱས་འཁོར་བ་འཇིག་དང་སུམ་ཁྲིའི་དུས་སུ་གསེར་ཐུབ། ཉི་ཁྲིའི་ཚེ་འོད་སྲུངས། བརྒྱ་བའི་ཚེ་སངས་རྒྱས་ཤཱཀྱ་ཐུབ་པ་བྱུང༌།  དེ་བས་ཤཱཀྱ་ཐུབ་པ་ནི་ནང་བའི་བསྟན་པ་གསུང་མཁན་མ་ཡིན་པར་ད་ལྟའི་ནང་བའི་བསྟན་པ་འདི་གསུང་མཁན་ཡིན།   ནང་བའི་ཆོས་ཀྱི་སྟོན་པ་སངས་རྒྱས་ཤཱཀྱ་ཐུབ་པ་ནི་སྤྱི་ལོ་སྔོན་གྱི625ལོར་ཆུ་བོ་གངྒའི་འགྲམ་གྱི་རྒྱ་གར་གྱི་རྒྱལ་ཕྲན་སེར་སྐྱའི་གྲོང་ཁྱེར་གྱི་རྒྱལ་བོ་ཟས་གཙང་དང་བཙུན་མོ་སྒྱུ་མ་ལྷུམས་མཛེས་གཉིས་ཀྱི་སྲས་སུ་དེང་གི་བལ་བོའི་མངའ་ཁོངས་ལུམྦུ་ནིའི་སྐྱེད་ཚལ་དུ་འཁྲུངས། ཞག་བདུན་ནས་མ་ཚེ་འཕོས་པས་སྐྱེ་དགུ་བདག་མོས་བསྐྱངས། མཚན་ལ་གཞོན་ནུ་དོན་འགྲུབ་གསོལ། ལང་ཚོ་རིམ་བཞིན་རྒྱས་ཏེ་ཡི་གེ་སློབ་པའི་གྲྭར་ཞུགས་ནས་སློབ་དཔོན་ཀུན་ཀྱི་བཤེས་གཉེན་ཞེས་བྱ་བ་བསྟེན་ཏེ་ཡི་གེ་སྣ་ཚོགས་བསྟན་པ་ཙམ་གྱིས་མཁྱེན། དེ་ནས་མདའ་འཕེན་པ་དང་ཆུར་རྐྱལ་བ། གླང་བོ་ཆེ་འདུལ་བ་ལ་སོགས་པའི་སྒྱུ་རྩལ་སྣ་ཚོགས་སྦྱངས་ཏེ་སུས་ཀྱང་དོ་ཟླ་མི་འཕེར་བ་བྱས། དེ་དང་ལྷན་དུ་འབངས་ཀྱི་བདེ་སྡུག་ལ་རྟོག་ཞིབ་དང་སྐྱེ་རྒ་ན་འཆིའི་སྡུག་བསྔལ་ཐུགས་གཞིག་གནང་སྟེ་ཇི་ལྟར་བྱས་ན་འགྲོ་བའི་སྡུག་བསྔལ་འགྲོལ་བར་བསམ་བློ་བཏང༌།

　　ཁོང་གིས་འགྲོ་བའི་སྡུག་བསྔལ་ལ་རྟག་ཏུ་ཐུགས་གཞིག་གནང་བ་དེས་རྒྱལ་བོ་ཟས་གཙང་ལ་བློ་དོགས་བྱུང་ནས་རིགས་གཟུགས་ལང་ཚོ་དང་ལྡན་པའི་བུ་མོ་ས་འཚོ་མ་དང་རི་དྭགས་སྐྱེས་མ། གྲགས་འཛིན་མ་སོགས་ཁབ་ཏུ་བསུས་ཏེ་གླུ་གར་རོལ་མོ་བཅས་རྒྱལ་སྲས་འདི་བག་མེད་རྒྱས་སྤྲས་ལ་རོལ་དུ་བཅུག་ནས་ཁོང་གི་དགོངས་པ་འགྲོ་བའི་སྡུག་བསྔལ་བསམ་པ་ལས་ལྡོག་སྟེ་སྟོབས་འབྱོར་མཛངས་གསུམ་ལྡན་པའི་རྒྱལ་ཁབ་ཆེན་པོ་ཞིག་བྱས་ཏེ་རྒྱ་གར་གྱི་རྒྱལ་ཕྲན་ཐམས་ཅད་གཅིག་ཏུ་བསྡུས་ནས་རྒྱལ་ཁབ་ཆེན་མོ་ཞིག་གཟུགས་རྩིས་བྱས། ཡིན་ན་ཡང༌། ཁོང་གི་སྤྱན་ཟུང་ནི་རིས་མེད་འགྲོ་བའི་སྡུག་བསྔལ་སྟེང་དུ་ཤོར་ཞིང༌། ཐུགས་དགོངས་སུ་ཇི་ལྟར་བྱས་ན་འགྲོ་བའི་སྡུག་བསྔལ་བསལ་བར་ཐུགས་གཞིག་གནང༌།

　　དེ་ལྟར་དགུང་ལོ་ཉི་ཤུ་རྩ་དགུ་བར་བཞུགས་པས་གྲགས་འཛིན་མར་སྲས་དགྲ་གཅན་འཛིན་འཁྲུངས་ཤིང༌། ཁོང་གིས་བརྩེ་དུང་གིས་ཕྱུག་པའི་ཆུང་མ་དང་བུ་ཕྲུག  རྒྱལ་ཁབ་དང་རྒྱུ་ནོར་བཅས་ཡོད་ཚད་བློས་བཏང་ནས་སྐྱེ་རྒ་ན་འཆི་དང་བཅས་པའི་འགྲོ་བའི་སྡུག་བསྔལ་སྒྲོལ་བའི་ཐབས་ལམ་ཞིག་འཚོལ་བར་ཐག་བཅད་པས་རྒྱལ་བོ་ཟས་གཙང་གིས་བློ་དོགས་ཆེན་པོས་སྲུང་དུ་བཅུག་མོད།  ཁོང་ཉིད་ལྐོག་ཏུ་བྲོས་ཏེ་ནགས་སུ་དར་གོས་ཀྱི་ན་བཟའ་དང་རྒྱན་ཆ་རྣམས་དོར། ཕྱག་དུར་ཁྲོད་ཀྱི་གོས་གྱོན་ཏེ་རབ་ཏུ་བྱུང་ནས་ཟས་གོས་ངན་ངོན་ཙམ་ལ་བརྟེན་ནས་ཕྱོགས་སུ་འཁྱམས། བླ་ན་མེད་པའི་བྱང་ཆུབ་མ་བརྙེས་པར་ཕྱིར་སེར་སྐྱའི་གྲོང་ཁྱེར་དུ་མི་ལྡོག་པའི་དམ་བཅའ་བྱས།

　　འགྲོ་བའི་སྡུག་བསྔལ་ལས་བསྒྲལ་བའི་ཆེད་དུ་སྐབས་དེར་གྲགས་པ་རྒྱས་པའི་རྒྱ་གར་གྱི་བསམ་བློ་བ་ཆེན་པོ་བྲམ་ཟེ་རིགས་ལྡན་དང་བྲམ་ཟེ་པད་མའི་གནས། དྲང་སྲོང་ནམ་གྲུའི་གནས། སྒྱུ་རྩལ་ཤེས་ཀྱི་བུ་རིང་འཕུར་སོགས་བསྟེན་ཏེ་དེ་དག་ལས་དཀའ་ཐུབ་འབུམ་འགྱུར་བྱས་པས་དེ་དག་གི་རྟོགས་པའི་ཡོན་ཏན་ཐམས་ཅད་མངོན་དུ་གྱུར་ཀྱང་དེ་ཡིས་འགྲོ་བའི་སྡུག་བསྔལ་བསལ་མི་ཐུབ་པས་ཐབས་མ་ཡིན་པར་མཐོང༌། དེ་ནས་ཆུ་བོ་ནེ་རན་ཛཱ་ནའི་གནས་སུ་སོང་ནས་ཉིན་རེ་ལ་རྒྱ་ཤུག་འབྲུ་ཙམ་རེ་གསོལ་ཞིང་རྗེས་སུ་ཅི་ཡང་མེད་པར་དཀའ་ཐུབ་སྤྱད་པས་ལུས་བསྐམས་ཤིང༌། དེ་ནས་ཏིལ་འབྲུ་གཅིག་དང་འབྲས་འབྲུ་གཅིག་ཙམ་གྱིས་ལོ་དྲུག་གི་བར་ཏིང་ངེ་འཛིན་ལ་ཞུགས་ནས་དཀའ་ཐུབ་སྤྱད་པས་མདོག་ནག་པོར་གྱུར་ཅིང༌། མི་རྣམས་ཀྱི་སྣང་ངོར་དུར་ཁྲོད་ཀྱི་འདྲེ་ཡིན་སྙམ་པ་བྱུང༌། དེ་ལྟར་མི་ཚེའི་བདེན་པ་མ་རྙེད་པས་བུ་མོ་ལེགས་སྐྱེས་མས་ཕུལ་བའི་འོ་ཐུག་སྦྲང་རྩིའི་སྙིང་བོ་ཅན་གསོལ་ཏེ་ལུས་ཀྱི་མདངས་གསོས། དུར་ཁྲོད་ཀྱི་རས་བཀྲུས་ནས་ཆོས་གོས་བཟོས་ཏེ་གསོལ་ནས་བྱང་ཆུབ་ཀྱི་སྙིང་བོར་གཤེགས་སོ།།དེ་རུ་རྩྭ་འཚོང་བ་ཁྱེའུ་བཀྲ་ཤིས་ཟེར་བ་ལས་རྩྭ་བསླངས་ཏེ་བྱང་ཆུབ་ཤིང་དྲུང་དུ་བཏིང་སྟེ་སྐྱིལ་མོ་ཀྲུང་བཅས་ནས་ཁ་ཤར་དུ་ཕྱོགས་ནས་ལུས་དྲང་བོར་བསྲངས། སྟན་འདིར་བདག་གི་ལུས་འདི་བསྐམས་ཀྱང་རུང༌།། པགས་པ་རུས་པ་ཤ་རྣམས་ཞིག་ཀྱང་རུང༌།། བསྐལ་མང་རྙེད་དཀའི་བྱང་ཆུབ་མ་ཐོབ་པར།། སྟན་འདི་ལས་ནི་བསྐྱོད་པར་མི་བྱའོ།།ཞེས་དམ་བཅས་ཏེ་རྩེ་གཅིག་ཏུ་སྒོམ་ནས་བཞུགས་སོ།།

　　དེའི་དུས་བདུད་ཀྱིས་ཕོ་ཉར་སྤྲུལ་ཏེ་སེར་སྐྱའི་གྲོང་ལྷས་སྦྱིན་གྱིས་ཁ་བཏགས་སོ་ཞེས་འཕྲིན་བརྗོད་པ་དང་དྲག་པོའི་དཔུང་གིས་རྒོལ་བ་དང་གཅན་གཟན་སྣ་ཚོགས་ཀྱང་འཇིགས་རྔམ་སྟོན་པ། བུ་མོ་མཛེས་མས་དུང་བ་སྟོན་པ་སོགས་ཇི་ལྟར་བྱས་ཀྱང་ཐུགས་གཡོ་བ་སྤུ་ཙམ་ཡང་མ་བྱུང་བར་བྱམས་སྙིང་རྗེ་སོགས་ཀྱི་ཏིང་ངེ་འཛིན་ལ་མངོན་པར་བཞུགས་ནས་དགུང་ལོ་སོ་ལྔ་བཞེས་པའི་ལོ་དེའི་ས་ག་ཟླ་བའི་ཚེས་བཅོ་ལྔའི་ཐུན་མཐའ་མའི་དུས་ནས་མངོན་པར་རྫོགས་པར་སངས་རྒྱས་སོ།། དེ་ནས་སྟོན་པ་སངས་རྒྱས་ཀྱིས་དྲང་སྲོང་ལྷུང་བ་རི་དྭགས་ཀྱི་ནགས་སུ་ལྔ་སྡེ་བཟང་བོ་ལ་བདེན་བཞིའི་ཆོས་འཁོར་བསྐོར། བྱ་རྒོད་ཕུང་བོའི་རིར་བྱང་ཆུབ་སེམས་དཔའ་མང་བོ་ལ་མཚན་ཉིད་ངོ་བོ་ཉིད་མེད་པའི་ཆོས་འཁོར་བསྐོར། ཡངས་པ་ཅན་ལ་སོགས་པའི་གནས་སུ་ལེགས་ཕྱེའི་ཆོས་འཁོར་བསྐོར་པ་སྟེ་ཆོས་ཀྱི་འཁོར་ལོ་གསུམ་དང་རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་ཞེས་པར་སྔགས་ཀྱི་ཐེག་པ་གསུངས་ཏེ་དགུང་ལོ་བརྒྱད་ཅུ་བ་སྟེ་སྤྱི་ལོ་སྔོན་གྱི545ལོར་སྐུ་དངོས་ཀྱི་གདུལ་བྱ་མཐའ་མ་ཀུན་ཏུ་རྒྱུ་རབ་བཟང་གྲོལ་བར་བྱས་ཏེ་མྱ་ངན་ལས་འདས་སོ།།

　　  འཁྲབ་སྟོན་པ་ཧི་མན་ཤུ●སོ་ནི།

　　ཧི་མན་ཤུ•སོ་ནི་ལགས་ནི1988ལོའི་ཟླ2པའི་ཚེས1ཉིན་རྒྱ་གར་ནུབ་ཕྱོགས་ཀྱི་རྒྱལ་ཕྲན་ལཱ་ཅཱ་སི་ཐཱན་ཞེས་པའི་རྒྱལ་ཕྲན་གྱི་ཀྲའེ་ཕུརཞེས་པའི(Jaipur)གྲོང་ཁྱེར་དུ་སྐྱེས་ཤིང་། ཁོང་ལ་ནུ་མོ་གཉིས་ཡོད། ཁོ་མཱན་སི་ལོར་ཐེ་ཀོར་རྒྱལ་སྤྱིའི་སློབ་ཆེན་ནས་མཐར་ཕྱིན་རྗེས། ལཱ་ཅ་སི་ཐན་ཚོང་ལས་སློབ་ཆེན་ནས་ཚོང་ལས་རབ་འབྱམས་པའི་བསླབ་གནས་བླངས། སྤྱི་ལོ2011ལོ་ནས་ཁོས་རང་ཉིད་ཀྱི་ཕུགས་བསམ་གྱི་ཆེད་དུ། ཁྱིམ་དང་ཁ་བྲལ་ནས་འགྲུལ་བཞུད་བྱེད་འགོ་བརྩམས། སྐབས་དེར་ཁོ་ལོ་ཉེར་གསུམ་ཡིན། ངར་ཤུགས་དང་དཔའ་སྤོབས་ཀྱིས་ཁེངས། སྒྱུ་རྩལ་གྱི་ལས་རིགས་ནི་ཁོ་ལ་མཚོན་ན་སླ་མོ་ཞིག་གཞི་ནས་མ་ཡིན་པས་དཀའ་སྡུག་མང་པོར་གདོང་ལེན་བྱས་ནས། སྔར་ལས་ཕུགས་བསམ་གྱི་ཆེད་དུ་སེམས་ཐག་རྦད་ཆོད་བྱས། ཁོས་ཐོག་དང་པོར་འཁྲབ་སྟོན་བྱས་པའི་མུ་འབྲེལ་བརྙན་འཕྲིན་ཟློས་གར་ནི《ཞིན་ཡེzindagiཧན་གོར་ཧྲན་དངparvarish》ཞེས་པ་དེ་ཡིན་ལ། དེར་དགའ་བསུ་ཆེར་མ་ཐོབ།

　　2013ལོའི་ཉིན་ཞིག་ལ། ཁོས་སངས་རྒྱས་ཀྱི་རྣམ་ཐར་ཁྲོད་ཀྱི་སངས་རྒྱས་ཤཱཀྱ་མུ་ནེ་ཞེས་པའི་མི་སྣ་འཁྲབ་སྦྱོང་གི་བརྡ་ཁྱབ་མཐོང་ནས་དེར་ཚོད་ལྟ་བྱེད་དུ་སོང་། འཁྲབ་སྟོན་པ་མི300ཚོད་ལྟ་བྱས་པ་ལས་ཁོང་འབུར་དུ་ཐོན་པར་གྱུར། 2013ལོ་སྟེ་ཁོང་དགུང་ལོ25ཡིན་དུས། 《སངས་རྒྱས》ཞེས་པའི་མུ་འབྲེལ་བརྙན་འཕྲིན་ཟློས་གར་གྱི་བརྙན་ཕབ་འགོ་བཙུགས། དོན་བྱ་དེ་ནི་ཁོའི་མི་ཚེ་ཁྲོད་ཀྱི་ཤིན་ཏུ་གལ་ཆེ་བའི་འགྲུལ་བཞུད་ཅིག་ཏུ་ཆགས།

　　སངས་རྒྱས་ཤཱཀྱ་མུ་ནེ་ཞེས་པའི་མི་སྣ་དེ་ལེགས་པོར་འཁྲབ་སྟོན་བྱ་ཆེད། ཁོས་ཟླ་དྲུག་ནས་ཟླ་བརྒྱད་ཀྱི་དུས་ཚོད་བེད་སྤྱད་དེ་སངས་རྒྱས་ཀྱི་རྣམ་ཐར་དང་འབྲེལ་བའི་དགོངས་དོན་བརྩམས་ཆོས་ལ་ཞིབ་འཇུག་དང་ལྟ་ཀློག་བྱས། དེ་མིན་སྒོམ་སྦྱོང་དང་གྲི་རྩལ་དང་། དྲག་རྩལ། དབྱུག་རྩལ་འདྲ་མིན་མང་པོ་སྦྱོང་བརྡར་བྱས་པ་དེས་ཁོ་ལ་ཕན་ངེས་ཅན་ཞིག་ཐོགས་ལ།  ཤཱཀྱའི་སྲས་རྒྱལ་བུ་དོན་གྲུབ་ཞེས་པའི་མི་སྣའི་སྣང་བརྙན་དང་། དགུང་ལོ18ནས་དགུང་ལོ80བར་གྱི་དུར་རིམ་རེ་རེའི་མི་སྣའི་ཁྱད་ཆོས་འཁྲབ་སྟོན་ལས་ལེགས་པོར་འཁྲབ་ཐུབ་པར་གྱུར།

　　《སངས་རྒྱས》ཞེས་པའི་མུ་འབྲེལ་བརྙན་འཕྲིན་ཟློས་གར་ལ་སྤྱི་ལོ2013ལོའི་རྒྱ་གར་རྒྱལ་ཡོངས་ནས་དགའ་བསུ་ཆེན་པོ་ཐོབ་པར་མ་ཟད། རྒྱལ་ཁབ་ཁོ་རི་ཡ་དང་སིངྒ་ལ། འབར་མ། ཡོབ་གླིང་། ཨིན་ཇི། ཨ་རི་སོགས་རྒྱལ་ཁབ་མང་པོས་དགའ་བསུ་ཐོབ་ཅིང་། གཟིགས་མོ་བ་མི་དུང་ཕྱུར་ལྔ་ལ་བསླེབས་པ་རེད།