སྐབས་བཅུ་དགུ་པའི་ཧྲང་ཧེ་རྒྱལ་སྤྱིའི་གློག་བརྙན་དུས་སྟོན་སྐབས་བོད་འབུར་དུ་ཐོན་པ།

 

གློག་བརྙན་“རྒྱུད་སྐུད་སྟེང་གི་རྣམ་ཤེས།”ནང་གི་འཁྲབ་སྟོན་པ་སྦྱིན་པ་མི་སྣ་བཀྲ་བྷེའི་ཚུལ་དང་བུད་མེད་འཁྲབ་སྟོན་པ་ཆོས་ཉིད་ཚེ་རིང་མི་སྣ་ཆུང་གི་ཚུལ་དུ་ཡོད་པ།  

          རྒྱ་ནག་ཧྲང་ཧེ་རྒྱལ་སྤྱིའི་གློག་བརྙན་དུས་སྟོན་ཐེངས་༡༩པ་དེ་རེས་གཟའ་སྤེན་པའི་ཉིན་མགོ་འཛུགས་བྱ་རྒྱུ་ཡིན་པ་དང་། ད་ཐེངས་ཀུན་གྱིས་དོ་སྣང་བྱེད་ཡུལ་ནི་ཟླ་བ་འདིའི་ཚེས་༡༩ཉིན་གསེར་གྱི་ཕོར་པའི་བྱ་དགའ་(Golden Goblet) ལ་འགྲན་ཞུགས་བྱེད་མཁན་གློག་བརྙན་༡༤ ཡོད་པ་རེད། ཐེངས་འདིའི་འགྲན་ཞུགས་གློག་བརྙན་དག་གི་ཁྱབ་ཁོངས་ནི་ཧྥི་ལི་པིན་ནས་ཌེན་མརཀ་དང་། ཨི་རན་ནས་ཉི་ཧོང་སོགས་གོ་ལ་ཧྲིལ་བོར་ཁྱབ་ཐུབ་ཡོད་ཅིང་། སྐབས་༡༩ པའི་གློག་བརྙན་དུས་སྟོན་དེར་རྒྱ་ནག་གི་དབང་བསྒྱུར་འོག་གི་བོད་མཐོ་སྒང་དེ་ཆེས་འབུར་དུ་ཐོན་ཡོད།

 

          རྒྱ་ནག་གི་འགྲན་ཞུགས་ནང་ཚུད་པའི་གློག་བརྙན་གསུམ་ནས་གཉིས་ནི་བོད་དང་འབྲེལ་བ་ཡོད་པ་དང་། དེ་དག་ནི་འཁྲབ་ཁྲིད་པ་ལཱིའུ་ཇཱེས་ཀྱི་༼ཊེ་ལཱན།༽(‘De Lan’ by director Liu Jie) དང་། འཁྲབ་ཁྲིད་པ་ཛང་ཡཱང་གྱི་༼རྒྱུད་སྐུད་སྟེང་གི་རྣམ་ཤེས།༽ (‘Soul on a String’ by Zhang Yang)ཞེས་པའི་གློག་བརྙན་གཉིས་ཆགས་ཡོད།

 

          གློག་བརྙན་འདི་གཉིས་ཕབ་སྐྲུན་ཟིན་རྗེས་རྒྱ་ནག་འོག་གི་གྲངས་ཉུང་མི་རིགས་སྤྱི་དང་། ཡང་སྒོས་བོད་རིགས་རྣམས་གློག་བརྙན་ནང་མཚོན་ཐབས་ཐད་ལ་འགྱུར་ལྡོག་གི་ནུས་པ་ཆེན་པོ་འཐོན་སྲིད་པའི་ཡིད་ཆེས་བྱེད་ཀྱིན་ཡོད་འདུག

 

            དུས་སྟོན་དེའི་རྒྱ་ཡིག་གི་སྟངས་འཛིན་པ་ཝུ་ཇུ་རིན་ཟེར་བ་ཞིག་གིས། “དེ་སྔ་ཡིན་ན་རྒྱ་ནག་གི་གློག་བརྙན་ལས་རིགས་ནང་བོད་སྐོར་གྱི་གནས་ཚུལ་རེ་ཟུང་མ་གཏོགས་སྟོན་སྲོལ་མེད། དཔེར་ན། སྤྱི་ཚོགས་རིང་ལུགས་དྲིལ་བསྒྲགས་སྐོར་གྱི་གློག་བརྙན་ཏེ། མི་རིགས་ནང་ཁུལ་འཆམ་མཐུན་དང་རྒྱལ་ཁབ་ཀྱི་མཐུན་སྒྲིལ་སྐོར་དང་། ཚོང་དོན་གྱི་གློག་བརྙན་རིགས་ཏེ་བོད་དེ་གནའ་བོའི་སྒྲུང་གཏམ་བཞིན་མི་རྣམས་དེར་བྲོས་བྱོལ་ལ་འགྲོ་བའི་རིགས་ལྟ་བུ་རེད།”ཅེས་དང་། ཁོང་གིས་མུ་མཐུད་བརྗོད་དོན། “མ་གཞི་གོང་གི་གློག་བརྙན་དེ་རིགས་ད་དུང་ཕབ་སྐྲུན་བྱེད་ཀྱིན་ཡོད་ཀྱང་། རྒྱ་ནག་གི་འཁྲབ་ཁྲིད་པ་ཚོས་བོད་སྐོར་མཚོན་ཐབས་གསར་པ་སྤྱད་དེ་སྐབས་རེར་ཆབ་སྲིད་དང་འབྲེལ་བའི་ནང་དོན་གལ་ཆེན་རིགས་མངོན་པར་མི་གསལ་བའི་ཚུལ་དུ་མངོན་ཐབས་བྱེད་ཀྱིན་ཡོད་སྟབས། བོད་དང་འབྲེལ་བའི་གློག་བརྙན་གྱི་ཁ་ཕྱོགས་རྒྱ་ཆེ་རུ་འགྲོ་བཞིན་ཡོད་པ་རེད། ”ཅེས་བཤད་འདུག

 

           རྒྱ་ནག་དམར་ཤོག་གཞུང་འཛིན་པ་ཚོས་འདས་པའི་ལོ་མང་རིང་། འཛམ་གླིང་ཁྱོན་ཡོངས་སུ་གུས་བརྩི་ཆེན་པོ་ཞུ་ཡུལ་བཙན་བྱོལ་བོད་མིའི་དབུ་ཁྲིད་ཏཱ་ལིའི་བླ་མས་བོད་རང་བཙན་ལ་རྒྱབ་སྐྱོར་བྱེད་ཀྱིན་འདུག་ཅེས་སྐྱོན་འཛུགས་བྱེད་བཞིན་ཡོད་པ་དང་། ཕྱི་ལོ་༢༠༠༨ལོའི་བོད་མིའི་ཡར་ལངས་ངོ་རྒོལ་རྗེས་ནས་བཟུང་རྒྱ་གཞུང་གིས་བོད་རང་སྐྱོང་ལྗོངས་ཀྱི་ས་ཁུལ་ཁག་ལ་དམ་དྲག་ཤུགས་ཆེན་བྱེད་མུས་ཐོག བོད་མི་ཚོས་རང་ལུས་མེར་སྲེག་གི་ལས་འགུལ་ཡང་བསྟུད་དམར་སྤེལ་བཞིན་ཡོད་པ་རེད།

 

          ཐེངས་འདིའི་གསེར་གྱི་ཕོར་པའི་དཔྱད་འདེམས་པ་དང་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་ཀྱིས། “ད་དུང་ཡང་གློག་བརྙན་འཁྲབ་ཁྲིད་པ་ཚོས་བོད་ཀྱི་འཚོ་བ་དངོས་དེ་ཏག་ཏག་མཚོན་ཐབས་བྱེད་བཞིན་པའི་སྒང་ཡིན་པ་དང་། ད་ལྟའི་ཆར་འཁྲབ་ཁྲིད་པ་ཚོས་བོད་དང་འབྲེལ་བའི་ཕྱོགས་ལྷུང་གི་ལྟ་ཚུལ་རྙིང་པ་རྣམས་དོར་ཐབས་བྱེད་ཀྱིན་ཡོད་པ་རེད། ” ཅེས་བརྗོད་འདུག

 

           ཉེ་བའི་ལོ་ཤས་རིང་བོད་ཁུལ་དུ་ཡུལ་སྐོར་བ་རིམ་པས་ཇེ་མང་དུ་འགྲོ་བཞིན་པའི་རྐྱེན་གྱིས་རྒྱ་ནག་གི་གློག་བརྙན་ལས་རིགས་ནང་བོད་དང་འབྲེལ་བའི་འཁྲུལ་སྣང་དག་ཀྱང་རིམ་ཀྱིས་འཐོར་ཞིག་ཏུ་འགྲོ་བཞིན་ཡོད་པ་རེད། བོད་ནང་འགྲུལ་བཞུད་བྱེད་པར་ད་དུང་གཞུང་གི་དམ་དྲག་བྱེད་ཀྱིན་ཡོད་ཀྱང་། རྒྱ་རིགས་དང་རྒྱ་རིགས་མིན་པའི་ཡུལ་སྐོར་བ་འབོར་ཆེན་ཞིག་དེ་སྔ་སྒྲུང་དང་པར་རིས་ཁོ་ནའི་སྟེང་གི་བོད་དེར་དངོས་སུ་བསྐྱོད་ཐུབ་པ་བྱུང་ཡོད།

 

            མཁས་དབང་ཁག་ཅིག་གིས་བརྗོད་དོན། “འདས་པའི་ལོ་ངོ་༡༠ ཡི་ནང་བོད་རང་གི་གློག་བརྙན་འཁྲབ་ཁྲིད་པ་ཡག་པོ་འགའ་ཕྱིར་ཐོན་ཐུབ་པ་བྱུང་བ་དེ་ནི་བོད་དང་འབྲེལ་བའི་གློག་བརྙན་ལས་རིགས་ཐོག་གི་འཕེལ་རྒྱས་དང་གྲུབ་འབྲས་རླབས་ཆེན་ཞིག་ཏུ་བརྩི་བཞིན་ཡོད། ” ཅེས་བརྗོད་འདུག ཕྱི་ལོ་༢༠༡༥ ལོའི་པདྨ་ཚེ་བརྟན་གྱི་༼ཐར་ལོ། ༽དང་། ཟོན་ཐར་རྒྱལ་གྱི་༼གཙང་པོ། ༽སོགས་ཀྱི་གློག་བརྙན་དེ་དག་སྤྱི་ཚོགས་ཐོག་འགྲེམས་སྤེལ་བྱས་པ་དང་སྟབས་བསྟུན་ཏེ། བོད་རང་གི་འཁྲབ་ཁྲིད་པའི་ཚ་རླབས་ཤིག་འཕྱུར་བ་དེས་བོད་ཐོག་འཛིན་པའི་འཁྲུལ་སྣང་དང་འཇིག་རྟེན་གཞན་པ་ལྟ་བུའི་ལྟ་ཚུལ་དེ་དག་རིང་དུ་དོར་ཏེ། གློག་བརྙན་གཟིགས་མོ་བ་ཚོར་དེང་དུས་བོད་པའི་དངོས་ཡོད་གནས་ཚུལ་སྤྱན་འབུལ་ཞུས་ཡོད་པ་རེད།

 

          ཀོ་ལིམ་བྷི་ཡ་གཙུག་ལག་སློབ་གྲྭའི་དེང་རབས་བོད་ཀྱི་སློབ་སྦྱོང་སྡེ་ཚན་གྱི་འགན་འཛིན་རོ་བྷེ་ཊེ་བྷ་ནྷེ་ཊེ་(Robert Barnett) ལགས་ཀྱིས་བོད་ཀྱི་གཞོན་སྐྱེས་གློག་བརྙན་འཁྲབ་ཁྲིད་པ་ཚོར་བརྗོད་རྒྱུར། “བོད་ཀྱི་གཞོན་སྐྱེས་འཁྲབ་ཁྲིད་པ་འདི་དག་གིས་ང་ཚོར་ལས་སླ་པོ་དང་དྲི་ལན་ཐད་ཀར་མེད་པའི་བརྩམས་ཆོས་བསྟུད་མར་འགྲེམས་སྤེལ་བྱེད་ཅིང་། ཁོང་ཚོའི་གློག་བརྙན་མང་པོས་དེང་དུས་བོད་ཀྱི་དཀའ་རྙོག་རང་བཞིན་ཅན་གྱི་འཚོ་བ་དེ་དམར་རྗེན་དུ་སྟོན་གང་ཐུབ་བྱས་འདུག” ཅེས་དང་། ཁོང་གིས་མུ་མཐུད་བརྗོད་རྒྱུར། “གློག་བརྙན་དེ་ཚོའི་དམིགས་ཡུལ་ཆེད་མངགས་སྲིད་གཞུང་གི་ཁ་གཏད་བྱེད་རྒྱུ་དེ་མིན་ཡང་། གང་ལྟར། དེ་དག་གིས་ང་ཚོར་འདི་རེད་ཅེས་པའི་བརྡ་གསལ་པོ་ཞིག་སྤྲོད་ཀྱི་ཡོད་པ་རེད། ”ཅེས་བརྗོད་འདུག

 

           གློག་བརྙན་མང་ཆེ་བའི་ནང་དོན་ནི་སྲིད་གཞུང་གི་དེང་རབས་ཅན་གྱི་ལས་གཞི་དག་གིས་རྐྱེན་པས་བོད་ཀྱི་སྲོལ་རྒྱུན་འཚོ་བ་དང་རིག་གཞུང་ལ་ཤུགས་རྐྱེན་ཐེབས་པའི་སྐོར་ཡིན་པ་དང་། རྒྱ་ཧན་མི་རིགས་ཀྱི་གློག་བརྙན་འཁྲབ་ཁྲིད་པ་འགས། “བོད་རང་གིས་གློག་བརྙན་བཟོ་སྐྲུན་འཕེལ་རྒྱས་སུ་བཏང་བ་དེས་ང་ཚོ་དང་རིག་གཞུང་མི་གཅིག་པའི་ཕྱི་མི་དག་ལ་བོད་དང་འབྲེལ་བའི་གནས་ཚུལ་མང་པོ་གསལ་རྟོགས་ཡོང་གི་བཅུག་ཡོད། ” ཅེས་བརྗོད་འདུག

 

           སྐུ་ཞབས་ཛང་ཡཱང་གིས། “བོད་ཀྱི་སྐོར་བོད་རིགས་འཁྲབ་ཁྲིད་པ་རང་གིས་བརྙན་ཕབ་དང་བཟོ་སྐྲུན་བྱས་པའི་གློག་བརྙན་དེ་དག་ནི་བོད་རིགས་མིན་པའི་གློག་བརྙན་འཁྲབ་ཁྲིད་པ་གཞན་ཚོར་ཟུར་བལྟའི་བརྩམས་ཆོས་ཤིག་གི་ཚུལ་དུ་དགེ་མཚན་ཆེན་པོ་ལྡན་པ་དང་། གློག་བརྙན་དེ་དག་གིས་གློག་བརྙན་འཁྲབ་གཞུང་གི་སྲོལ་རྒྱུན་ནང་དོན་ལས་བརྒལ་ཐུབ་པའི་ལམ་སྟོན་བྱས་པ་རེད། ”ཅེས་བརྗོད་འདུག

 

         ༼རྒྱུད་སྐུད་སྟེང་གི་རྣམ་ཤེས། ༽ཞེས་པའི་གློག་བརྙན་དེའི་གྲ་སྒྲིག་གི་ཆེད་དུ་འཁྲབ་ཁྲིད་པ་ཛང་ཡཱང་ལགས་ཕྱི་ལོ་༢༠༡༣ ལོར་ཟླ་བ་ཁ་ཤས་རིང་བོད་ནང་བསྡད་ཡོད་འདུག ཁོང་གི་ཉམས་མྱོང་རེ་འགའ་ན་ནིང་ལོའི་དངོས་བྱུང་དང་རྟོག་བཟོ་ཟུང་འབྲེལ་ཅན་གྱི་༼སེམས་ཀྱི་འགྲུལ་ལམ།༽ཞེས་པའི་གློག་བརྙན་དེའི་ནང་མཐོང་རྒྱུ་ཡོད་པ་རེད། གློག་བརྙན་དེ་ནི་བོད་མི་གནས་སྐོར་བ་ཁྱུ་གཅིག་གིས་སྟོད་གངས་རིན་པོ་ཆེ་བསྐོར་བའི་འགྲུལ་བཞུད་རིང་མོའི་སྐོར་ཞིག་ཡིན་འདུག

 

           གློག་བརྙན་འཁྲབ་ཁྲིད་པས། “ང་རང་ངོས་ནས་དང་ཐོག་༼རྒྱུད་སྐུད་སྟེང་གི་རྣམ་ཤེས།༽ཞེས་པའི་གློག་བརྙན་དེའི་བཟོ་སྐྲུན་གྲ་སྒྲིག་མ་བྱས་གོང་ལ་བོད་མི་ཚོར་རྒྱུས་མངའ་ལོན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད་པ་དང་། ཁོང་ཚོའི་ཉིན་རེའི་འཚོ་བ་དང་ཆོས་ལུགས་སོགས་ཀྱི་སྐོར་དངོས་སུ་མཐོང་ཐོས་ཡོང་བར་བྱས་པ་ཡིན།”ཞེས་བརྗོད་འདུག

 

            དམངས་ཁྲོད་གཏམ་རྒྱུད་དང་ཆོ་འཕྲུལ་རང་བཞིན་གྱི་ཁྱད་ཆོས་ལྡན་པའི་གློག་བརྙན་གསར་པ་དེ་ནི་བོད་ཀྱི་རྩོམ་པ་པོ་གྲགས་ཅན་བཀྲ་ཤིས་ཟླ་བ་ལགས་ཀྱི་བརྩམས་སྒྲུང་ལ་གཞི་བཅོལ་ཡོད་པ་དང་། གློག་བརྙན་ནང་གི་མི་སྣ་གཙོ་བོ་བཀྲ་བྷེ་༼བོད་ཀྱི་འཁྲབ་སྟོན་པ་སྦྱིན་པ། ༽ལགས་ལ་ཐོག་གིས་བརྒྱབ་སྟེ་འདས་གྲོངས་སུ་ཕྱིན་རྗེས་སླར་སྤྲུལ་སྐུ་ཞིག་གིས་རྫུ་འཕྲུལ་ལ་བརྟེན་ཏེ་ཕྱིར་གསོན་དུ་བཅུག་པ་རེད། གློག་བརྙན་དེའི་ནང་ཁོང་གིས་གཟི་བཙལ་བའི་འགྲུལ་བཞུད་ཀྱི་བརྒྱུད་རིམ་ཚུད་ཡོད་པ་དང་། འཁྲབ་སྟོན་པ་ཚང་མ་བོད་རིགས་ཡིན་པ་དང་བོད་སྐད་ཁོ་ན་བེད་སྤྱོད་བྱས་ཡོད་འདུག

 

           གློག་བརྙན་དཔྱད་བརྗོད་པ་འགས། “ད་ལྟ་གཞི་ནས་མ་གཏོགས་བོད་རིགས་མིན་པའི་འཁྲབ་ཁྲིད་པ་མང་པོ་ཞིག་གིས་བོད་རིགས་དེ་མི་རིགས་བྱེ་བྲག་པ་ཞིག་ཡིན་པའི་ངོ་བོ་མཚོན་པའི་གློག་བརྙན་མང་པོ་ཕབ་སྐྲུན་བྱེད་ཐུབ་ཀྱི་མེད། ” ཅེས་བརྗོད་འདུག

          དེ་མིན་རྒྱ་ནག་གི་གློག་བརྙན་སྐོར་གྱི་མཁས་པ་ད་ལྟ་ཊོ་རོན་ཊོར་བཞུགས་ཡོད་པའི་ཤཱེ་ལི་ཁི་རེ་སཱི་(Shelly Kraicer)ལགས་ཀྱིས། “སྲིད་གཞུང་གིས་རྒྱབ་སྐྱོར་བྱེད་པའི་དྲིལ་བསྒྲགས་སྐོར་གྱི་གློག་བརྙན་དག་ཕུད་པའི་ད་དུང་སྐབས་རེར་རྒྱ་ཧན་མི་རིགས་ཀྱི་འཁྲབ་ཁྲིད་པ་རེ་ཟུང་གིས་ཀུན་སློང་རྣམ་དག་གི་སྒོ་ནས་བོད་མིའི་དངོས་ཡོད་གནས་སྟངས་ཕྱིར་མངོན་ཐབས་བྱས་པ་དེ་འདྲ་ཡང་ཡོང་གི་ཡོད་པ་རེད། ” ཅེས་གསལ་བཤད་བྱས་འདུག ཁོང་གིས་མུ་མཐུད་དོན། “ཡིན་ཡང་མཐའ་མཇུག་དེར་ཚང་མས་བོད་ཀྱི་རྣམ་པ་དེ་རང་དགར་བཀོལ་སྤྱོད་གང་ཐུབ་བྱེད་ཀྱི་ཡོད་པ་རེད། ” ཅེས་བརྗོད་སོང་།

 

           གྲངས་ཉུང་མི་རིགས་སྐོར་གྱི་གློག་བརྙན་སྤྱི་དང་། དམིགས་བསལ་གྱིས་བོད་དང་འབྲེལ་བའི་གློག་བརྙན་དག་ལ་འཕྲད་སྐབས་ས་གནས་དེའི་ལོ་རྒྱུས་དང་ཆོས་ཕྱོགས་ཀྱི་འགྲེལ་བཤད་སོགས་གཞུང་གིས་ཅི་བཤད་ལ་ཉན་དགོས་སྟབས། འཁྲབ་ཁྲིད་པ་ཚོས་དམིགས་བསལ་གྱིས་ནན་ཏན་བྱེད་དགོས་འཁེལ་གྱི་ཡོད་འདུག

 

           བོད་དང་འབྲེལ་བའི་གློག་བརྙན་ཕབ་སྐྲུན་ཟིན་པ་ཡོད་དོ་ཅོག་སྲིད་གཞུང་གི་གསར་ལམ་དོ་དམ་ཚན་པ་ཙམ་མ་ཟད། འཐབ་ཕྱོགས་གཅིག་གྱུར་ལས་ཁུངས་ནས་ཞིབ་བཤེར་ལྟ་རྟོགས་ནན་པོ་བྱེད་ཀྱིན་ཡོད་ཅིང་། ལས་ཁུངས་དེ་ནི་དམར་ཤོག་གཞུང་གི་ཐད་ཀའི་འཛིན་སྐྱོང་འོག་གནས་ཡོད་པ་རེད།

 

          འཁྲབ་ཁྲིད་པ་སྐུ་ཞབས་ལཱིའུ་ཡིས། “གློག་བརྙན་གཞན་པ་དག་ལས་བོད་དང་འབྲེལ་བའི་གློག་བརྙན་དེ་དག་ཕབ་སྐྲུན་བྱེད་སྐབས་གཞུང་གི་ཞིབ་བཤེར་དང་གདོང་ཐུག་ཡང་ཡང་རྒྱག་གི་ཡོད་པ་རེད། ” ཅེས་བརྗོད་འདུག

 

         སྐུ་ཞབས་ལཱིའུ་ཡི་གློག་བརྙན་དེ་ནི་བོད་ཀྱི་ས་ཁུལ་ཏེ་ད་ལྟའི་རྒྱ་ནག་གི་ཡུ་ནན་ཞིང་ཆེན་གྱི་བྱང་ཕྱོགས་སུ་ཕབ་སྐྲུན་བྱས་ཡོད་པ་དང་། གློག་བརྙན་དེའི་ལོ་དུས་ནི་༡༩༨༠ ཡས་མས་ལ་འཁེལ་ཡོད་འདུག མི་སྣ་གཙོ་བོ་རྒྱ་ཧན་མི་རིགས་ཀྱི་གཞོན་ནུ་ཞོའུ་ཝཱང་ཞེས་པ་ཞིག་བོད་ཀྱི་གྲོང་གསེབ་དག་གི་ནང་རྒྱུན་དུ་དངུལ་བུན་གཏོང་བ་དང་། བུ་ལོན་ལེན་པར་ཡོང་བའི་དུས་ཤིག་ལ་གྲོང་གསེབ་ཅིག་གི་ནང་བུད་མེད་མིང་ལ་ཊེ་ལཱན་*ཟེར་བ་ཞིག་དང་བརྩེ་དུང་ཆགས་པའི་སྐོར་ཡིན་འདུག

 

          ཁོང་གིས་གློག་བརྙན་དེ་རྒྱ་ནག་ནང་འགྲེམས་སྟོན་བྱས་རྗེས་གཟིགས་མོ་བ་ཚོས་བསམ་ཚུལ་འདྲ་མིན་སྤེལ་བའི་སྐོར་ཕྱིར་དྲན་བྱས་དོན། “མི་རིགས་གཅིག་གིས་ང་རང་ལ་འདི་ལྟར་བོད་ཀྱི་དབུལ་ཕོངས་ཀྱི་སྐོར་སྟོན་པ་དེ་ནི་མ་འགྲིག་པ་ཞིག་རེད། ” ཅེས་དང་། “ཡང་མི་གཞན་པ་ཚོས་ང་རང་ལ་ཁྱེད་ཀྱིས་རྒྱ་ཧན་མི་རིགས་ཤིག་གིས་བོད་རིགས་ལ་དངུལ་བུན་གཏོང་བའི་སྐོར་བཀོད་འདུག་ཅེས་ནང་དོན་དེར་ཀུན་གྱིས་ཚོར་བ་རྣོན་པོ་བྱེད་ཀྱི་འདུག” ཅེས་བརྗོད་འདུག

 

          འཁྲབ་ཁྲིད་པ་ཁ་ཤས་ཀྱིས་རང་གི་གློག་བརྙན་དེ་སྲིད་གཞུང་གི་ཞིབ་བཤེར་འོག་ནས་ཐར་ཆེད་དུ་བོད་མིའི་ཉིན་རེ་འཚོ་བའི་ཆ་ཤས་རེ་ཟུང་ལས་ཆོས་དང་ལོ་རྒྱུས་སོགས་རྒྱ་ཆེ་བའི་འཚོ་བ་དངོས་དང་གཡོལ་ཐབས་བྱེད་པའི་སྐོར་བོད་རིགས་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ཀྱིས་བཤད་རྒྱུར། “ང་ཚོས་ཐབས་ཤེས་གང་བྱས་ཀྱང་བོད་ཀྱི་གློག་བརྙན་ཞིག་ཡིན་ཕྱིར་བོད་ཀྱི་ཆོས་དང་ལོ་རྒྱུས་ཉིན་རེའི་འཚོ་བ་དང་ཁ་འབྲལ་ཐབས་མེད་པ་བཞིན་གློག་བརྙན་ནང་དུའང་དེ་བཞིན་ཡིན་པར་བསྙོན་ཐབས་མེད། ”ཅེས་བརྗོད་འདུག

 

          གང་ལྟར་སྲིད་གཞུང་གི་ཞིབ་བཤེར་དང་དམ་དྲག་ལ་མ་ལྟོས་པར་བོད་ཀྱི་གློག་བརྙན་འཁྲབ་ཁྲིད་པ་མང་པོས་མ་འོངས་པར་རེ་བ་བཟང་སར་རྒྱག་གི་ཡོད་འདུག བོད་མི་ཚོ་ཡང་གློག་བརྙན་ཟློས་གར་ལ་དགའ་སྤྲོ་ཇེ་ཆེར་འགྲོ་བཞིན་ཡོད་པ་དང་བོད་རང་གི་འཁྲབ་ཁྲིད་པ་ཚོར་ཡིན་ནའང་དེང་རབས་ཅན་གྱི་ཤུགས་རྐྱེན་སྐོར་དང་དེ་མིན་ནང་ལོགས་ས་ཁུལ་གྱི་གནད་དོན་གཞན་སོགས་ཆབ་སྲིད་དང་ཐད་ཀར་འབྲེལ་བ་མེད་པའི་ནང་དོན་མང་པོ་འཚོལ་ཞིབ་བྱ་རྒྱུ་ལྷག་ཡོད་པ་རེད།

 

          ཡིན་ཡང་བོད་རིགས་མ་ཡིན་པའི་གློག་བརྙན་འཁྲབ་ཁྲིད་པ་མང་པོ་ཞིག་གིས་ད་དུང་ཡང་བཟང་ཕྱོགས་ཀྱི་འགྱུར་ལྡོག་ཡོང་བའི་རེ་བ་བྱེད་ཀྱི་མེད་པ་དང་། བོད་རིགས་མིན་པའི་འཁྲབ་ཁྲིད་པ་འགའ་ཡིས་བོད་སྐོར་གྱི་སྒྲུང་གཏམ་གསར་པ་འཚོལ་ཞིབ་བྱེད་སྐབས། སྲིད་གཞུང་གི་ཞིབ་བཤེར་ནན་དྲགས་པས་དབང་གིས་བོད་ཀྱི་གློག་བརྙན་འཕེལ་རིམ་ལ་ད་དུང་འགལ་རྐྱེན་ཆེན་པོ་འཕྲད་བཞིན་ཡོད་པ་རེད།

 

           ཀོ་ལིམ་བྷི་ཡའི་གཙུག་ལག་སློབ་གྲྭའི་སྐུ་ཞབས་བྷ་ནྷེ་ཊེ་བརྗོད་དོན་ལ། “བོད་རིགས་མ་ཡིན་པའི་གློག་བརྙན་འཁྲབ་ཁྲིད་པ་རྒྱ་རིགས་དང་ནུབ་ཕྱོགས་པ་སུ་ཡིན་རུང་ཁོང་ཚོས་བོད་ཀྱི་དོན་དངོས་མཚོན་པའི་གློག་བརྙན་དོ་གལ་ཅན་ཞིག་ཕབ་སྐྲུན་བྱ་འདོད་ན་དང་ཐོག་འཁྲབ་ཁྲིད་པ་རང་ཉིད་ཀྱི་རྒྱལ་ཁབ་ཀྱི་མི་སེར་སྤེལ་བའི་རིང་ལུགས་ལ་ལྡན་པའི་སྐྱོན་ཆ་དག་དང་ལེན་ཐུབ་པའི་སྒོ་ནས་རང་གི་གློག་བརྙན་བརྩམས་ཆོས་ཁྲོད་མི་སེར་སྤེལ་ཡུལ་དེ་ཉིད་ཀྱི་མི་མང་ཚོའི་ཉིན་རེའི་འཚོ་བ་ཚུན་ལ་ཕྱིའི་ཤུགས་རྐྱེན་ཐེབས་ཟིན་པའི་དོན་དངོས་དེ་མཚོན་ཐབས་བྱ་དགོས། ” ཞེས་དང་། ཁོང་གིས་མུ་མཐུད་བརྗོད་དོན། “གལ་ཏེ། དེ་ལྟར་མ་བྱུང་བ་ཡིན་ན་གློག་བརྙན་ག་ཚོད་ཕབ་སྐྲུན་བྱས་ཀྱང་གྲུབ་འབྲས་ནི་རྟག་པ་གཅིག་སྟེ་འཁྲབ་ཁྲིད་པར་མི་སེར་སྤེལ་ཡུལ་ལ་སྙིང་རྗེའི་འདུ་ཤེས་ཅུང་ཡོད་མོད་དོན་དམ་བརྩམས་ཆོས་ནང་ས་གནས་དེའི་འཚོ་བ་དངོས་དང་མི་འཚམ་པའི་རྟོག་བཟོ་རང་བཞིན་ཅན་ཞིག་ལས་མ་འདས། ”ཞེས་གསལ་སྟོན་གནང་འདུག ཧྲང་ཧེ་རྒྱལ་སྤྱིའི་གློག་བརྙན་དུས་སྟོན་འདི་ནི་ཐོག་མ་ཕྱི་ལོ་༡༩༩༣ ལོར་མགོ་འཛུགས་བྱས་ཡོད་པ་དང་། ད་ལྟའི་ཆར་ཤར་ཨེ་ཤ་ཡའི་གློག་བརྙན་དུས་སྟོན་ཆེ་ཤོས་ཤིག་གི་གྲས་ལ་བསླེབས་ཡོད་འདུག

 

ཟུར་མཆན།

* ‘De Lan’ ཞེས་པ་ནི་གློག་བརྙན་ནང་གི་བོད་ཀྱི་གྲོང་གསེབ་བུད་མེད་དེའི་མིང་ཡིན་ཡང་། བོད་མིང་ཏག་ཏག་ཤེས་ཐུབ་མ་སོང་བས་ཊེ་ལཱན་ཞེས་སྒྲ་རང་འཇགས་བཞག་པ་ཡིན།

མ་ཡིག་འབྲེལ་ཐག http://www.nytimes.com/2016/06/11/arts/international/tibet-china-shanghai-international-film-festival.html?partner=rss&emc=rss&_r=0

བློ་བཟང་ཡེ་ཤེས་ལགས་ཀྱིས་ཨ་རིའི་ནེའུ་ཡོག་དུས་བབ་དབྱིན་ཡིག་དྲ་བ་ལས་བོད་བསྒྱུར་ཞུས།